කිත්සිරි ගායනය සහ නර්තනය
උදහස් වීමෙන් පුල්වන් නරනිඳු
වන මැද සිර කර තැබුමට මඟ සැදු
සීතා පතිනිය සිය කුසයෙන් වැදු
කිත්සිරි වෙමි මම මෙදියත පරසිදු
මලෙන් උපත ලද මලය කුමරු හට
ඊතණ පිරිමැද ආ සඳලිඳු හට
වැඩුමල් සොයුරා ලෙස කල්ගත කොට
ලංකාගමනය සිදුවිය මෙලෙසට
මලය කුමරුගේ ගායනය සහ නර්තනය
නපුරු දිවි දොස් – වැලඳ පඬුවස් – නිරිඳු විඳි දුක් – සැල වුණා
නිරිඳ සුවපත් – කරන යහපත් – මිතුරු අදහස් – ඇති වුණා
පවර සහසැස් – වරම ලැබගත් – සකලවිධ සිප් – ලද මනා
රුවිනි පැහැපත් – තෙදිනි බලවත් – මලය නම් වෙමි – සසොබනා
සඳලිඳු කුමරුගේ ගායනය සහ නර්තනය
කුවේණි නම් දිවි යකින්න – කළ උවදුරු දුරු කරන්න
දිවි දෝෂය මඟ හැරෙන්න – පඬුවස් දෙව් රජු රකින්න
මහනෙල් මලකින් උපන්න – මලය කුමරු සමඟ එන්න
සදෙව් ලොවින් වරම් දුන් – සඳලිඳු මම වෙමි ප්‍රසන්න
තිදෙන එක්ව හෝ ගායක පිරිසක ගායනය
ඉසිවරු විත් ලෝබ නැතුව ලැබ දුන් අපමණ
යන්ත්‍ර මන්ත්‍ර ශිල්ප ශාස්ත්‍ර පරතෙරටම දැන
සකල කලාවන් පිරිසිඳ ඉන් ඵල ලැබ ගෙන
හන්තානා කන්ද ළඟට ආවෙමු මෙලෙසින
තුන් බෑයන් ලෙස ලැබ සීතා පුත් තනතුරු
සුවපත් කර පඬුවස් දෙව් රජුගේ උවදුරු
ලියා තබමු නර්තන ඉතිහාසය විසිතුරු
එය ලක්දිව පවතිනු ඇත ඉර හඳ ඇති තුරු
බණ්ඩාර ඇහැළියගොඩ
