එකම පවුලේ ඥාතීන් පිරිසක් ගමන් කළ ජීප් රථයක් මාර්ගයෙන් ඉවතට පැන අනතුරට පත්වීමෙන් එහි ගමන් ගත් පස්දෙනකු තුවාල ලබා මස්කෙළිය ප්‍රාදේශීය රෝහලට ඇතුළත් කර අනතුරුව තුවාලකරුවන්ගේ තත්ත්වය බරපතළ වීම නිසා දික්ඔය මූලික රෝහලට මාරු කර යැවූ බව මස්කෙළිය පොලීසිය පවසයි.
ශ්‍රී පාද වන්දනාවේ පැමිණ ඇති මෙම පිරිස ඊයේ (30) ගොඩකවෙල දක්වා ජීප් රථය ධාවනය කරන අවස්ථාවේ ජීප් රථය නල්ලතන්නිය මස්කෙළිය ප්‍රධාන මාර්ගයේ මස්කෙළිය බ්‍රවුන්ලෝවත්ත ප්‍රදේශයේදී මාර්ගයෙන් ඉවතට පැන මෙම අනතුර සිදු වී ඇත.
ජීප් රථය අනතුරට පත් වන අවස්ථාවේ ජීප් රථයේ හත්දෙනකු ගමන් කර ඇති අතර, ඉන් කුඩා ළමයකු සහ රියැදුරා සුළු තුවාල ලබා ඇත.
ධාවනය වෙමින් තිබූ ජීප් රථයේ රියැදුරුට නින්ද යාමෙන් මෙම අනතුර සිදු වී ඇති බවත්, අනතුරෙන් ජීප් රථයට දැඩි හානි සිදු වී ඇති බවත් පොලීසිය පවසයි.
අනතුරෙන් කාන්තාවන් සිවුදෙනකු සහ පිරිමි පුද්ගලයකු තුවාල ලබා ඇති අතර, තුවාලකරුවන් ගොඩකවෙල, බළන්ගොඩ සහ රාගල ප්‍රදේශවල පදිංචිකරුවන් බව අනතුර සම්බන්ධයෙන් පරීක්ෂණ පවත්වන මස්කෙළිය පොලීසිය සඳහන් කරයි.
හැටන් – රංජිත් රාජපක්ෂ
