ශ්‍රී ලංකා සංචාරක සම්මාන උලෙළේ දී එයිට්කන් ස්පෙන්ස් ට්‍රැවල්ස් සමාගමට සම්මාන තුනක්

ශ්‍රී ලංකා සංචාරක සංවර්ධන අධිකාරිය මෑතක දී සංවිධාන කළ 2024 ශ්‍රී ලංකා සංචාරක සම්මාන උලෙළ හි දී හොඳම දේශීය සංචාරක සමාගම – විශාල සමාගම (Best Travel Agent Inbound – Large Category)” හොඳම සංචාරක නෞකා මෙහෙයුම්කරු (Best Cruise Lines Operator) සහ හොඳම වෘත්තීය MICE සංවිධායක (රැස්වීම්, දිරිදීමනා, සම්මන්ත්‍රණ සහ ප්‍රදර්ශන සංචාරක කර්මාන්තය වශයෙන් හැඳින්වෙන ව්‍යාපාරික සංචාර යටතේ එකම අරමුණක් වෙනුවෙන් විශාල පුද්ගලයන් පිරිසක් එක්ව කරන සංචාර සංවිධාන කිරීම) (Best Professional MICE Organizer) වශයෙන් ඉහළම සම්මාන තුනක් හිමි කරගැනීමට එයිට්කන් ස්පෙන්ස් ට්‍රැවල්ස් සමාගම සමත් විය. එය, සංචාරක ක්ෂේත්‍රය තුළ ඔවුන්ගේ අපේක්ෂාවන් මල් පල ගත් මොහොතකි.

මෙසේ ගෞරවයට පාත්‍ර වූයේ, සංචාරක ක්ෂේත්‍රයේ සංවර්ධනය වෙනුවෙන් කටයුතු කළ එයිට්කන් ස්පෙන්ස් ට්‍රැවල්ස් සමාගමෙහි නායකත්වය, දායකත්වය සහ කැපවීමයි. සමාගම අනුගමනය කරනු ලබන සංචාරක ගමනාන්ත අලෙවිකරණය, නව්‍යකරණය, මනා පිළිවෙත් මෙහිදී ඇගයුමට ලක් විය. එසේම, ක්ෂේත්‍රයේ ප්‍රමිතීන් ඉහළ නැංවීමෙහි ලා ලබා දුන් සැලකිය යුතු දායකත්වය මෙන්ම ශ්‍රී ලංකා සංචාරක ක්ෂේත්‍රයේ වර්ධනය වෙනුවෙන් එයිට්කන් ස්පෙන්ස් ට්‍රැවල්ස් සමාගම ඉටු කළ මෙහෙවර ගැන ද විශේෂයෙන් සඳහන් කෙරිණ. එයිට්කන් ස්පෙන්ස් ට්‍රැවල්ස් සමාගම ප්‍රධාන කාණ්ඩයෙහි හොඳම සංචාරක සමාගමට හිමි සම්මානයෙන් පිදුම් ලැබුවේ ක්ෂේත්‍රය තුළ සිය විශිෂ්ටත්වය මනාව විදහා දක්වමිනි. එසේම, සංචාරක නෞකා මෙහෙයුම් ක්ෂේත්‍රයෙහි ඉදිරියෙන්ම සිටිමින් එහි වෙ‍ෙළඳපොළින් 65%ක ට වැඩි ප්‍රමාණයක් අත්පත් කරගෙන ඇත්තේ බහු වරාය සංචාරක ගමනාන්තයන් සම්බන්ධයෙන් ගුණාත්මකභාවයෙන් යුතු ප්‍රමුඛ පෙළේ සමාගමක් වශයෙන් ශ්‍රී ලංකාවේ නාමය බබළවමිනි. හොඳම වෘත්තීය MICE සංවිධායක (Best Professional MICE Organizer) සම්මානය හරහා සමාගමේ ශක්තිය තවදුරටත් බලගැන්වුණු බව නිසැකය.

ශ්‍රී ලංකා සංචාරක සම්මාන සඳහා තේරීම් සිදු කිරීමේ දී විශාල පරාසයක් සම්බන්ධයෙන් වූ මූලික කාර්යසාධන සැලකිල්ලට ගැනුණි. සමාගම්වල විගණනය කළ මූල්‍ය කාර්යසාධනය, ආයතනික සමාජයීය වගකීම් පිළිබඳ වැඩපිළිවෙළ, පාරිසරික භාරකාරත්වය, ව්‍යාපාර සහ අලෙවිකරණ ක්‍රමෝපායයන්, පාරිභෝගික සේවාව, මානව සම්පත් කළමනාකරණය, සහ තිරසර පිළිවෙත් යන කරුණු එකී කාර්යසාධනවලට ඇතුළත් විය. සම්මානයට පාත්‍රවීමේ සුදුසුකම් ලත් සමාගම් තේරීමේ ක්‍රියාවලියට දායක වූයේ කර්මාන්තයේ ප්‍රවීණයන්ගෙන් සහ කීර්තිධර ආයතනික වෘත්තිකයන්ගෙන් සමන්විත මඬුල්ලකි. මෙහිදී සහභාගිත්වය දරන සමාගම් විසින් විස්තරාත්මක ලිඛිත අයදුම්පතක් ඉදිරිපත් කළ යුතු වූයේ විගණනය කළ ගිණුම් වාර්තා ද සමඟිනි. සහභාගි වූ එක් එක් සමාගම් විසින් පිළියෙල කළ ඉදිරිපත් කිරීමක් විනිශ්චය මඬුල්ලට දැක බලා ගැනීමේ අවස්ථාව ද සැලසිය යුතු විය.