“අදේශපාලනික වූ කිසිවක් නැත. සියල්ල දේශපාලනිකය.” එලෙස ලියුවේ ලෙනින්ය. ජන සමාජයේ පවතින සියලු සමාජීය කාරණාවලට දේශපාලනික ප්‍රස්තුතයක්, පදනමක්, වටපිටාවක්, බලපෑමක් ඇති බව ඒ ප්‍රකාශයෙන් ගම්‍ය වේ. ඒ නිසා ජන සමාජයේ සියලු පුද්ගල ක්‍රියාකාරකම්, හැසිරීම් සියල්ල දේශපාලනික අර්ථයෙන් වටහා ගැනීමට සිදු වී තිබේ.
පුද්ගලයා යනු සමාජයේ නිර්මාණයකි. මිනිසා සමාජශීලී සත්ත්වයකු නිසා සමාජ සම්බන්ධතා ගොඩනැඟෙයි. ඒ අනුව මානවයා පවතින සමාජ තත්ත්වයන්ට අනුකූලව සමාජානුයෝජනය වීම ද සිදු වෙයි. මානව පරිණාමයේ ආදිතම යුගයේ සිටම පුද්ගල ජීවිතය, සමාජ ජීවිතයට කේන්ද්‍රීය ලෙස ඒකාබද්ධව පවතින්නේ පුද්ගලයකුට හුදෙකලාව ජීවත් වීමට නොහැකි නිසාය. මිනිසා සාමූහික සත්ත්වයකු වශයෙන් සමාජයට අනුවර්තනය වීම, සහජ ළැදියාව අනුව සිදු වන බැවින් අන්තර් පුද්ගල සබඳතා ගොඩනඟා ගැනීම ද සිදු වේ. සමාජ විද්‍යාව මෙන්ම සමාජ මානව විද්‍යාව ද පුද්ගලයා හා සමාජය හදාරන අතර; එමඟින් මානව, සමාජ, සංස්කෘතික සබඳතා ගැන විමර්ශනයට ලක් කෙරේ.
ඉහත සියලු කාරණා ලිවීමට සිදු වූයේ ඉකුත් සතිය පුරා විවිධ ජනමාධ්‍ය සහ මුහුණු පොතේ විවිධ පුද්ගලයන්ගේ පෞද්ගලික ජීවිතය හාරඅවුස්සමින් ලියවෙන ඕපාදූප ගණයේ තොරතුරු හේතුවෙනි. එහි කිසියම් ප්‍රවෘත්තිමය වටිනාකමක් නොවූවත් කුණු රසය මත පදනම්ව ලියවෙන ඒ ඕපාදූපවලට වැඩි ඉල්ලුමක් පවතින බව හඳුනාගත හැකිය.
කෙනකුට පෞද්ගලික ජීවිතයක්, සමාජ ජීවිතයක්, සංස්කෘතික ජීවිතයක් සහ දේශපාලනික ජීවිතයක් තිබිය හැකිය. කෙනකුට මෙය සමබරව පවත්වාගත හැකි අතර, තවත් කෙනකුට මේවා අතර ඇති සියුම් බෙදුම් රේඛාව හඳුනා ගැනීමට නොහැකි බවක් දක්නට ලැබේ. ගැටලුව පැනනඟින්නේ සාමාන්‍ය පුරවැසියකුව සිටි අයකු පොදු අවධානයට ලක්වන්නකු බවට පත් වූ පසු ඔවුන්ගේ ක්‍රියාකාරකම්වලට සමාජ වටිනාකමක් ලැබෙන හෙයින් ඒ පිළිබඳ විමසිල්ලෙන් යුතුව කටයුතු කිරීමයි.
ජනප්‍රිය ක්‍රීඩකයන්, නළු නිළියන්, දේශපාලනඥයන්, ගායක ගායිකාවන් ඇතුළු සමාජයේ සුපිරි ස්තරයට ඔසවා තබනු ලැබූ බොහෝ පුද්ගලයන්ගේ පෞද්ගලික ජීවිතයේ තොරතුරු වැඩි සමාජ අවධානයකින් යුතුව ජනමාධ්‍යයේ හා සමාජ මාධ්‍යයේ වාර්තා කරන බවක් හඳුනාගත හැකිය. මේවා කිසිවකින් පොදු සමාජයට ඇති වටිනාකමක් නම් නැත. ඇත්තේ කුණු රසය පමණකි. එනිසා පුද්ගල ජීවිතය සමාජ ජීවිතයට ගැළපෙන ආකාරයට සකස් කර ගැනීමට අදාළ වගකීමක් තනි තනි පුද්ගලයන්ට පවතියි. මන්ද යත්: සෑම පුරවැසියකුම අවසානයේ සමාජයට වගකිවයුත්තකු වන හෙයිනි.
සමාජ මාධ්‍යයේ හා ඇතැම් වගකීම්විරහිත ජනමාධ්‍යයන්හි පළ වන ඕපාදූප පන්නයේ කුණු රසය දනවන කතාවලට ජාතික ජනමාධ්‍යයක ඉඩ වෙන් කළ යුතු යැයි අපි කල්පනා නොකරමු. ජනමාධ්‍යයේ සමාජ වගකීම එය නොවේ. එහෙත් පොදු අභිලාෂයන් මත කටයුතු කරන ජනමාධ්‍යයක් ලෙස මාධ්‍යයක ඇති සමාජ වගකීම නම් කවරක්දැයි ඉතා හොඳ වැටහීමක් අපට තිබේ.
වර්තමාන ආණ්ඩුව බලයට පත්වූයේ පුද්ගලභාවයට එපිටින් සාමූහිකත්වය අගයන ජන සමාජයක් ස්ථාපිත කරන බවට පොරොන්දු වෙමිනි. “පොහොසත් රටක් ලස්සන ජීවිතයක්” ප්‍රතිපත්ති ප්‍රකාශනයේ එය ඉතා පැහැදිලිව සඳහන් වේ.
ජනාධිපතිවරණයේදී හා මහමැතිවරණයේදී දුන් සුවිශේෂ ජනවරම ඉතා හොඳින් කියවා ගැනීම වැදගත් යැයි අපි යළිත් අවධාරණය කරමු. එනිසා එකී ජනවරම සමඟ යථාර්ථවාදීව කටයුතු කිරීම ආණ්ඩුවේ ප්‍රමුඛතම වගකීම වී තිබේ. නැතිනම් වඩා ඉහළින් බලාපොරොත්තු දල්වා ගත් ජන සමාජය ඉතා සරල, සිල්ලර කාරණා නිසා විරසකවීමේ අවදානමක් පවතින බව තේරුම් ගත යුතුය. ජනවරම හා ජන මනස හඳුනාගෙන කටයුතු කිරීම ඉතා වැදගත් බව අප සිතන්නේ ඒ හේතුවෙනි. මේ ද්වීපාර්ශ්වීය සන්නිවේදන ගනුදෙනුව අතිශය වැදගත්ය.
ආණ්ඩුවට ක්ෂණිකව කළ හැකි ක්‍රියාමාර්ග, දීර්ඝකාලීන ක්‍රියාමාර්ග, කළ හැකි දේ නොහැකි දේ අතර ඇති සීමාව ජනතාවට සන්නිවේදනය කළ යුතු වේ. එවැනි නම්‍යශීලී මාධ්‍ය භාවිතාවක්, සමාජ භාවිතාවක් පවත්වා ගැනීම අතිශය වැදගත් වේ. ජනතාව අතර පවතින සන්නිවේදන පරස්පර විරෝධතාව දුරු කර ගතහැක්කේ එවිටය. සාධාරණ, මිත්‍රශීලී විවේචන වඩාත් සුබදායක බව හඳුනා ගැනීම අත්‍යවශ්‍ය වේ.
නිලධාරි පෙළැන්තිය හා සංවිධානාත්මක බොහෝ පිරිස් ආණ්ඩුවේ වැඩපිළිවෙළ කඩාකප්පල් කිරීමට කටයුතු කරන බව හඳුනා ගැනීම ද අතිශය වැදගත්ය. ඒ අතරතුර විවිධ පන්නයේ පුවත් මැවීම ප්‍රමුඛතම කාර්යයකි. එමෙන්ම නිලධාරි පෙළැන්තිය විසින් රාජකාරි චක්‍රලේඛ මඟින් ආණ්ඩුවේ පැවැත්ම බිඳවැට්ටවීමට කටයුතු කරන බව මීට පෙර ද අපි ලියා තැබුවෙමු. ඒ නිසා සතුරු පාර්ශ්වය හා මිතුරු පාර්ශ්වය වෙන්කොට හඳුනා ගැනීම අතිශය වැදගත් කාරණයකි.
ජනප්‍රිය නොවන තීන්දු තීරණ ගැනීමට සිදු වන විට බාහිරින් ඇති වන පීඩනය කළමනාකරණය කර ගැනීමට ද හැකියාවක් තිබිය යුතුය. සුබවාදී ගමනාන්තයක් සඳහා ජනප්‍රිය නොවන තීන්දු තීරණ ගැනීම අත්‍යවශ්‍ය කාරණයකි. දේශපාලනික ජාත්‍යන්තර මිත්‍රත්වය ඒ අතරින් ප්‍රමුඛ වේ. නිලධාරි පන්තිය සමඟ පවත්වා ගන්නා අභ්‍යන්තරික සහයෝගය මෙන්ම පුරවැසි ජනතාව සමඟ පවත්නා බාහිර සම්බන්ධතාව ද කළමනාකරණය කර ගැනීම අත්‍යවශ්‍ය කාරණයකි. ඒ සඳහා වන සංවිධාන, විනය දේශපාලනික ව්‍යාපාරයකට අත්‍යවශ්‍ය වන්නා සේම රාජ්‍ය නිලධාරි පෙළැන්තියට ද එය අත්‍යවශ්‍ය කාරණයක් බව ඒත්තුගැන්විය යුතුය.
ආණ්ඩුව තවමත් සිටින්නේ රට නිවැරදි දිශාවට හරවා ගැනීමේ පීල්ලට යොමු කරවා ගැනීමේ උත්සාහයේය. එය අතිශය සංකීර්ණ ක්‍රියාවලියකි. Clean Sri Lanka වැඩපිළිවෙළ එහි ප්‍රමුඛතම අංගයකි. ඒ සඳහා වන නිශ්චිත මාර්ග සිතියම නව වසරේ ජනවාරි පළමුවැනිදා සිට සමාජගත කරනු ලැබේ. වසර හැත්තෑ හයක් තිස්සේ තට්ටු මාරු ක්‍රමයට රාජ්‍ය පාලනය කරමින් විනාශ කරනු ලැබ තිබූ රටක් එක්වරම ඉහළටම ඔසවා තැබිය නොහැකි බව ජන සමාජය තේරුම්ගත යුතුය. එය දීර්ඝ ක්‍රියාවලියකි. ඒ සඳහා සියලු දෙනාගේ සහයෝගය අපේක්ෂා කළ යුතු වේ. ජනප්‍රිය පුද්ගලයන්ගේ පෞද්ගලික ජීවිතයේ තොරතුරු පසුපස හඹා යෑම හෝ ඒවාට පිළිතුරු දීමට කාලය වැය කිරීමෙන් මූලික අරමුණ අමතක වන බව අපගේ හැඟීමයි. එමෙන්ම සමාජයේ අවධානයට ලක් වූ, සමාජයේ සුපිරි ස්ථරයට ඔසවා තබනු ලැබූ පුද්ගලයන් තමන්ගේ පෞද්ගලික ජීවිතයේ කුණුකන්දල් සමාජගත නොකිරීමට වගබලා ගැනීම ද අතිශය වැදගත් කාරණයකි. එවැනි කුණුකන්දල් ඕනෑතරම් ජන සමාජයේ පවතියි.
මිනිසුන්ගේ පෞද්ගලික ජීවිතයේ තොරතුරු, දේශපාලනික ජීවිතය සමඟ පටලවාගෙන ප්‍රවෘත්ති මවන අයට අපි මෙසේ කියා තබමු: යේසුස් වහන්සේ මෙසේ ප්‍රකාශ කළහ:
“රහසින්වත් පව් නොකළ අයෙක් පළමු ගල ගසන්න.”
එනිසා තමන්ගේ මල්ලේ දේශපාලන කුණුකන්දල් සහ පෞද්ගලික ජීවිතයේ කුණු කන්දල් ඉහවහා ගිය පිරිස් අනුන්ට ඇඟිලි දිගු කරන විට අපට ඇත්තේ පිළිකුල්සහගත බවකි.
එබැවින් අනවශ්‍ය අදේශපාලනික කාරණාවලට පිළිතුරු දීමට රජය හෝ බලධාරීන් කටයුතු කළ යුතුයැයි අපි අපේක්ෂා නොකරමු. මක් නිසාද යත්: එවිට අපට අපගේ මූලික අරමුණ මඟහැරී, අතුරු පාරවල ගමන් කිරීමට සිදු වන හෙයිනි. ජනතා බලාපොරොත්තු, ප්‍රාර්ථනා ඉටු කරන නිවැරදි ගමන් මාර්ගයේ නිශ්චිත ඉලක්කයක් සහිතව ගමන් කිරීම අතිශය වැදගත් හා තීරණාත්මක වනු ඇත. බාහිරින් එල්ල වන අතුරු සාධක සහ බලපෑම් නිසා ඒවාට පිළිතුරු දීමට කාලය මිඩංගු නොකිරීමත්, අතුරු මාර්ගවල ගමන් නොකිරීමත් ඒ හා සමාන වගකීමක් බව ද ලියා තැබිය යුතුමය.
