‘අනේ බලන්න ඔයා කරපු වැඩේ හරිද කියලා. බීගෙන ඇවිල්ලා හප්පලා මගේ පුතාව මරලා දැම්මා. දැන් ඉතින් ඔයා කොහෙන් හරි මගේ පුතා මට ගෙනත් දෙන්න. මට හිටිය එකම හයිය එච්චරයි. අනේ චූටි පුතේ, ඔයාවත් කියන්න මෙයාට ඔයාගේ අයියව ඉක්මනට මට ගෙනත් දෙන්න කියලා’ යැයි නිලූකා මහත්මිය එලෙස හඬා වැටෙමින් ආයාචනා කළේ හදිසි රිය අනතුරකින් මියගිය තම වැඩිමහල් පුතුගේ අකල් වියෝව දරාගත නොහැකිව අනතුර සිදු කළ රියදුරු ඉදිරියේ බැගෑපත් වෙමිනි. ඇය එලෙස වැලපෙනු දුටු කාගෙත් නෙත් කඳුළින් තෙත් වී ගියේ නොදැනුවත්වමය. සනුෂ් නදීක ගෝමස් නිලූකාගේ වැඩිමහල් පුතුය. 24 හැවිරිදි අවිවාහක තරුණයකු වන ඔහු රැකියාව කළේ පොකුණුවිට ප්‍රදේශයේ කර්මාන්ත ශාලාවක ගබඩාවකය. ඔහුට සිටි එකම සහෝදරයා නිරාෂ්ය.16 හැවිරිදි නිරාෂ් මදූරාවල මහා විද්‍යාලයේ ඉගෙනුම ලබන අතර මිය ගිය සනුෂ් අධ්‍යාපන කටයුතු සම්පූර්ණ කර ඇත්තේ කිරිඳිවැල මහා විද්‍යාලයෙනි. ඔහුගේ පියා වසර හයක පමණ කාලයක සිට ආගිය අතක් නොමැති අතර ඉන්පසු අඟුරුවාතොට, කනන්විල ප්‍රදේශයට පැමිණි මෙම තිදෙනා කුලී නිවෙසක ජීවත්වීමට කටයුතු කළේ කාටත් කරදරයක් නොවෙන අයුරිනි. 
නිලූකා යාල ප්‍රදේශයේ නිවෙසක සේවය කර දරු දෙදෙනාගේ අනාගතය සුරක්ෂිත කිරීමට වෙහෙසුණාය. ඇය දුක් විඳින අයුරු දුටු සනුෂ් මෙම රැකියාව තෝරා ගත්තේ මවට ශක්තියක් වීමටය. ඒ නත්තල් දිනයයි. මව සේවය කළ නිවෙසට යෑම සඳහා යාල හන්දියට යතුරුපැදියෙන් මවව ඇරලවීමට සනුෂ් කටයුතු කළේ උදෑසන 6.30ට පමණය. එදින නිවාඩු දිනයක් බැවින් නිවෙසටම වී සිටි සනුෂ් යතුරුපැදියට අවශ්‍ය කොටස් වගයක් ගැනීමට හොරණ, මතුගම මාර්ගයේ මදුරාවල දෙසට ගමන් කළේ සවස 5.00ට පමණය. ඒ ගොඩගම ප්‍රදේශයට යෑම සඳහාය. එහෙත් ඔහුට ගමන් කිරීමට ඉඩ ලැබුණේ මදුරාවල, ගොඩගම පාරට හැරෙන හංදිය අසලට පමණය. මතුගම දෙස සිට වේගයෙන් ඉදිරියට ආවේ පෞද්ගලික ඒ සී බස් රථයකි. එය විරුද්ධ දෙසට පැමිණ යතුරුපැදියේ ගැටී සනුෂ් සමඟ මීටර් 30ක් පමණ ඉදිරියට ගොස් අසල තාප්පයක ගැටී නතර වූයේ තාප්පයට ද හානි සිදු කරමිණි. බස් රථයේ ඉදිරිපස යතුරුපැදිය සමඟ සිරවී සිටි සනුෂ් හොරණ දිස්ත්‍රික් මහ රෝහලට රැගෙන ආවත් ඔහුට ජීවය ලබා දීමට වෛද්‍යවරුන්ට නොහැකි වූයේ අවාසනාවටය.
‘ළඟ ගෙදර අක්කා බලන්න ගියාම පුතා කියලා තියෙනවා මට අමාරුයි අම්මට එන්න කියන්න කියලා. අනේ මට පුතාගේ මූණවත් බලාගන්න බැරි වුණා. මං යනකොට ට්‍රොලියේ අත් දෙක ගහ ගහ හුස්ම ගන්න දඟලනවා දැක්කා. මං පුතා ළඟට යන්න හදනකොට දොස්තර මහත්තයා ඔපරේෂන් එකට කොලේකට අත්සන් කරන්න කියලා මාව එක්කගෙන ගියා. අනේ මගේ පුතා ඊට පස්සේ මාව දාලා ගිහිල්ලා තිබුණා. අපි කොහොමද පුතේ දැන් ඉතින් අයිය නැතුව තනියම ගෙදර යන්නේ’.
හෝමාගම ප්‍රදේශයේ පදිංචිකරුවකු වන පෞද්ගලික බස් රථයේ රියදුරු මිතුරන් පිරිසක් සමඟ මතුගම, රන්නදොල ඇල්ල නැරඹීම සඳහා ගොස් මත්පැන් පානය කර විනෝද වී ආපසු පැමිණෙමින් සිටියදී මෙම අනතුර සිදු වී ඇති බව මෙහිදී අනාවරණය වී තිබේ. අනතුර සිදුකිරීමෙන් පසුව අත්අඩංගුවට ගෙන සිදුකළ ස්වශන පරීක්ෂාවේ දී ඔහු බීමත්ව සිට ඇති බව සනාථ වූ බව පොලීසිය පවසයි. රියදුරුගේ බීමත්කම හා අපරික්ෂාකාරී රිය ධාවනය නිසා අකාලයේ මෙලෙස තරුණ ජීවිතයක් අහිමි වීම අවාසනාවකි.
හොරණ දිස්ත්‍රික් මහ රෝහලේ අධිකරණ වෛද්‍ය නිලධාරී වරංගනා තන්තිරිමළගේ මහත්මිය විසින් පශ්චාත් මරණ පරීක්ෂණය සිදු කළ අතර අඟුරුවාතොට පොලීසියේ පො.සැ. (55834) අනුරුද්ධ හා පො.කො. (96977) කසුන් යන නිලධාරින් විසින් මේ පිළිබඳ විමර්ශන සිදු කළහ.
රිය අනතුරක් හේතුවෙන් අක්මාවට හා ප්ලිහාවට සිදුවූ බරපතළ හානියෙන් අභ්‍යන්තර රුධිර වහනය වීම මත මෙම මරණය සිදුවී ඇති බවට හොරණ වැඩ බලන හදිසි මරණ පරීක්ෂක සාම විනිසුරු දීපාල් ඖෂධරත්න මහතා විසින් නිගමනය කළේය.
