2025 ජාතික තෛපොංගල් සැමරුම යාපනයේදී පැවැත්වීමට බුද්ධශාසන, ආගමික හා සංස්කෘතික කටයුතු අමාත්‍යංශය තීරණය කර තිබේ.
එහි ජාතික සැමරුම් උත්සවය 2025 ජනවාරි 18 දින යාපනය, තෙල්ලිපලේදී පැවැත්වීමට කටයුතු සංවිධාන කරමින් පවතින අතර ඊට සමගාමිව වැඩසටහන් රැසක්ද ක්‍රියාත්මක කිරීමට නියමිතය.
මේ වැඩසටහන් මාලාව සංවිධාන කිරීමේ ප්‍රගතිය පිළිබඳ සාකච්ඡාවක් බුද්ධශාසන, ආගමික හා සංස්කෘතික කටයුතු අමාත්‍ය ආචාර්ය හිනිදුම සුනිල් සෙනෙවි මහතාගේ ප්‍රධානත්වයෙන් ඊයේ(26) අමාත්‍යංශයේදී පැවැත්විණි. උදාර සංස්කෘතික ජීවිතයක් – සහකම්පනීය ජනතාවක් බිහි කිරීමේ ජාතික ජන බලවේගයේ දැක්ම අනුව යමින් එහි කැපී පෙනෙන කාර්යභාරයක් ඉටු කිරීමේ වගකීම බුද්ධශාසන, ආගමික හා සංස්කෘතික කටයුතු අමාත්‍යාංශයට පැවරී තිබේ. එමෙන්ම ජාතික සංවර්ධනයේ සැලකිය යුතු පංගුවක් ජාතික සමගිය වඩාත් තීව්‍ර කිරීමෙන් ළඟා කරගත හැකි බව බහුතර ජනතාවගේ විශ්වාසයයි.
ඊට රුකුලක් වනු පිණිස 2025 ජාතික තෛපොංගල් සැමරුම යාපනයේදී පැවැත්වීමට බුද්ධශාසන, ආගමික හා සංස්කෘතික කටයුතු අමාත්‍යංශය තීරණය කරනු ලැබීය. මේ අතර හින්දු බැතිමතුන් වාර්ෂිකව සංවිධාන කරන සබරිමලේ ‘හෝලි යාත්‍රා’ චාරිකාවට ශ්‍රී ලංකාව නියෝජනය කරමින් වැඩි බැතිමතුන් පිරිසක් සහභාගි කරවීමටත්, ඊට රාජ්‍ය නිල භාවය ලබාගැනීමටත් අවශ්‍ය කටයුතු සම්පාදනය කර දෙන ලෙස ප්‍රජා යටිතල පහසුකම් නියෝජ්‍ය අමාත්‍ය සුන්දරලිංගම් ප්‍රදීප් මහතා ඇතුළු පිරිස ඉල්ලා සිටි අතර, ඊට අවශ්‍ය කටයුතු සූදානම් කරන ලෙස අමාත්‍ය ආචාර්ය හිනිදුම සුනිල් සෙනෙවි මහතා හින්දු ආගමික හා සංස්කෘතික කටයුතු දෙපාර්තමේන්තුවේ නිලධාරීන්ට උපදෙස් දුන්නේය.
