හම්බන්තොට ජාත්‍යන්තර වරාය තුළ රුපියල් කෝටි 730ක (අමෙරිකානු ඩොලර් මිලියන 25) නව ව්‍යාපෘතියක් ක්‍රියාත්මක කිරීමට පියවර ගෙන තිබේ.
කම්ෆර්ට් මැට්රස් ලංකා පුද්ගලික සමාගම, හම්බන්තොට ජාත්‍යන්තර වරාය (HIP) කර්මාන්ත උද්‍යානයේ ව්‍යාපෘතියක් ආරම්භ කිරීමට අමෙරිකානු ඩොලර් මිලියන 25ක ආයෝජනයක් සිදු කිරීමට ගිවිසුම් අත්සන් කොට ඇත. සැපදායී ස්පොන්ජ් මෙට්ට නිෂ්පාදනය කිරීමේ කම්හලක් ඉදිකිරීම වෙනුවෙන් කම්ෆර්ට් මැට්රස් ලංකා සමාගම වරාය සමඟ ඇතිකර ගත් ගිවිසුම, HIP සිය බහාලුම් මෙහෙයුම් පුළුල් කිරීම සඳහා මෑතකදී දොඹකර පහසුකම් දියුණු කිරීමෙන් අනතුරුව, සිදු කර ඇති පළමු ආයෝජනය වෙයි.
මේ අමෙරිකානු ඩොලර් මිලියන 25ක ව්‍යාපෘතිය, අමෙරිකා එක්සත් ජනපදය, යුරෝපය සහ කැනඩාව ඇතුළු ප්‍රධාන අපනයන වෙළෙඳපොළ ඉලක්ක කරයි. හම්බන්තොට ජාත්‍යන්තර වරාය සමඟ වසර 30ක දීර්ඝ කාලීන නැවත අලුත් කළ හැකි ගිවිසුම යටතේ, ස්පොන්ජ් මෙට්ට නිෂ්පාදනය සහ සැකසීමට වර්ග මීටර් 62,000ක කර්මාන්ත ශාලාවක් ඉදිකිරීමට කම්ෆර්ට් මැට්රස් ලංකා සැලසුම් යොදා තිබෙන අතර, මේ ව්‍යාපෘතිය අග්නිදිග ආසියාවෙන් සහ චීනයෙන් අමුද්‍රව්‍ය ආනයනය කර සම්මත අඩි 20 බහාලුම් (TEU) 7,000ක වාර්ෂික නිපැයුමක් අපේක්ෂා කරයි.
නව ව්‍යාපෘතිය පිළිබඳ අදහස් දැක්වූ හම්බන්තොට ජාත්‍යන්තර වරායේ ප්‍රධාන විධායක නිලධාරී විල්සන් ක්ව් මහතා පැවැසූයේ හම්බන්තොට ජාත්‍යන්තර වරායේ බහාලුම් අංගනයේ අඛණ්ඩ වර්ධනය, වරාය ප්‍රතිනැව්ගත කිරීමේ දොරටුවක් මෙන්ම ප්‍රධාන කාර්මික මධ්‍යස්ථානයක් ලෙස ස්ථානගත කිරීමට තම සමාගම දරන ප්‍රයත්නයන්ට ඇතුළත් වන බවයි.
