පසුගිය නොවැම්බර් මස ඇති වූ ගංවතුර තත්ත්වය හේතුවෙන් මහ කන්නයේ සිදු වූ වගාහානි තක්සේරු කිරීම්වල දිස්ත්‍රික්ක 10ක තක්සේරු කටයුතු මේ මස 30 වැනිදා වන විට අවසන් කෙරෙනු ඇතැයි කෘෂිකාර්මික හා ගොවිජන රක්ෂණ මණ්ඩලයේ සභාපති පේමසිරි ජාසිංආරච්චි මහතා කියයි. මේ වන විට අදාළ තක්සේරු කටයුතු පොලොන්නරු, මුලතිව්, වවුනියා හා මන්නාරම් දිස්ත්‍රික්කවල අවසන් කර ඇතැයිද ඒ මහතා පවසයි.
මඩකලපු, අම්පාර, ත්‍රිකුණාමල දිස්ත්‍රික්කවල වගා හානි තක්සේරු කටයුතු මේ 29 වැනිදා අවසන් කිරීමට නියමිත අතර, අනුරාධපුර, කුරුණෑගල, මාතලේ දිස්ත්‍රික්කවල වගා හානි පරීක්ෂාවන් මේ 30 වැනිදා අවසන් කිරීමට කටයුතු යොදා ඇත.
මේ වන විට හඳුනාගෙන ඇති වගාහානි ගොවි බිම් ප්‍රමාණය අක්කර 80,000කට ආසන්න වේ. ඒ හානි තක්සේරුවට අදාළ නිර්දේශ ලද වහා අදාළ වන්දි මුදල් වගා හානි ආපදාවට ලක් වූ ගොවීන්ගේ ගිණුම්වලට බැර කෙරෙන බවද සභාපතිවරයා අවධාරණය කරයි. මේ වගා හානි තක්සේරු කටයුතු සඳහා කෘෂිකාර්මික හා ගොවිජන රක්ෂණ මණ්ඩලයේ නිලධාරීන්, ගොවිජන සංවර්ධන දෙපාර්තමේන්තුවේ නිලධාරීන්, කෘෂිකර්ම පර්යේෂණ හා නිෂ්පාදන සහකාරවරුන් ඇතුළු නිලධාරීහු සහ ගොවි සමිති නායකයෝ සහභාගි වෙති. වගා හානි වාර්තා කර ඇති සියලු ගොවි බිම් ඉතා විනිවිද භාවයෙන් යුතුව මේ නිලධාරීන් විසින් පරීක්ෂාවට ලක් කරන බවද කෘෂිකාර්මික හා ගොවිජන රක්ෂණ මණ්ඩලයේ සභාපති පේමසිරි ජාසිංආරච්චි මහතා ප්‍රකාශ කරයි.
