දකුණු කොරියානු ජනාධිපතිවරයා දෝෂාභියෝගයකින් බලයෙන් පහ කර සති දෙකක් ගතවීමටත් පෙර එරට විපක්ෂය වැඩබලන ජනාධිපති ලෙස කටයුතු කරන අගමැතිවරයාට එරෙහිවත් දෝෂාභියෝගයක් ඉදිරිපත් කර ඇතැයි විදෙස් මාධ්‍ය වාර්තා කළේය. එම දෝෂාභියෝගය ඉදිරිපත් කර ඇත්තේ දකුණු කොරියාවේ ව්‍යවස්ථා අධිකරණයට ප්‍රධාන විපක්ෂය වන ප්‍රජාතන්ත්‍රවාදී පක්ෂය නිර්දේශ කළ විනිසුරුවන් අගමැතිවරයා විසින් ප්‍රතික්ෂේප කරනු ලැබීම හේතුවෙන් බවද විදෙස් මාධ්‍ය වැඩිදුරටත් වාර්තා කළේය. එමෙන්ම පසුගියදා දකුණු කොරියාවේ යුද නීතිය ප්‍රකාශයට පත් කිරීමට අගමැතිවරයා ද ජනපතිට සහාය දැක්වූ බවටත් විපක්ෂයේ චෝදනා එල්ල වී ඇතැයි විදෙස් මාධ්‍ය සඳහන් කළේය.
ජනාධිපති යූන් සුන් යෝල් යුද නීතිය ප්‍රකාශයට පත් කිරීම සම්බන්ධව විශේෂ විමර්ශනයක් පැවැත්වීම සඳහා විපක්ෂය විසින් පාර්ලිමේන්තුවට ඉදිරිපත් කරනු ලැබූ පනතක් ඇතුළුව තවත් පනත් කිහිපයක් සිය බලය යොදා ප්‍රතික්ෂේප කිරිමට ද අගමැතිවරයා කටයුතු කර ඇතැයි විදෙස් මාධ්‍ය වාර්තා කළේය. දකුණු කොරියාවේ පාර්ලිමේන්තුවේ විපක්ෂයට මන්ත්‍රීවරු 192 දෙනකු සිටින අතර, දෝෂාභියෝගයෙන් අගමැතිවරයා පරාජයට පත් කිරීමට මන්ත්‍රීවරු 300න් 151 දෙනකුගේ ඡන්දය ප්‍රමාණවත් වන බව වාර්තා වේ.
