ඊළඟ වසර කිහිපය ඇතුළත ගුවන් මගීන්ගේ සංඛ්‍යාව සැලකිය යුතු අයුරින් ඉහළ නැංවිම අරමුණු කරමින් ඉන්දියාවේ ගුවන්තොටුපොළ සංවර්ධනය කිරිම සඳහා අමෙරිකානු ඩොලර් බිලියන 70.6ක් ආයෝජනය කිරීමට එරට ගුවන්තොටුපොළ අධිකාරිය සැලසුම් කර ඇතැයි විදෙස් මාධ්‍ය වාර්තා කළේය. ජාත්‍යන්තර ගුවන්තොටුපොළ පුළුල් කිරිම, මගීන්ගේ පහසුකම් වැඩිදියුණු කිරීම සහ කාර්යමක්ෂතාව ඉහළ දැමිම ඉන් අපේක්ෂා කරන බවත්, එමගින් ඉන්දියාවේ ගුවන් ගමන් ක්ෂේත්‍රයේ 12%ක වාර්ෂික ප්‍රගතියක් අත්කර ගැනීම ඉලක්කය වී ඇති බවත් විදෙස් මාධ්‍ය වැඩිදුරටත් වාර්තා කළේය.
කොවිඩ් වසංගතයට පෙර ඉන්දියාවේ දේශීය ගුවන් මගීන්ගේ සංඛ්‍යාව ලොව තුන්වැනි විශාලතම දේශිය ගුවන් මගීන් සංඛ්‍යාව බවට පත්වී තිබූ අතර, ඉදිරි වසර කිහිපය ඇතුළත නැවත එම තත්ත්වය දක්වා ඉන්දියාවේ ගුවන් ගමන් ක්ෂේත්‍රය ඉහළ නැංවීම එරට ගුවන්තොටුපොළ අධිකාරියේ අරමුණ වී ඇතැයි ද වාර්තා වේ. එරට ගුවන් ගමන් ප්‍රවීණයන්ට අනුව වසර 2035 වන විට ඉන්දියාවේ වාර්ෂික ගුවන් මගීන්ගේ සංඛ්‍යාව මිලියන 500 ට ළඟාවනු ඇතැයි ද අනාවැකි පළ වී තිබේ.
