ලබන වසරේ පෙබරවාරි මාසයේදී පැවැත්වීමට නියමිත චැම්පියන්ස් කුසලාන ක්‍රිකට් තරගාවලියේ ඉන්දීය – පාකිස්තාන ක්‍රිකට් තරග ඩුබායිහිදී පැවැත්වීමට තීරණය වෙයි. මෙම තරග ශ්‍රී ලංකාවේ පැවැත්වීමට කලින් පාකිස්තානය අයිසීසීයෙන් ඉල්ලා සිටිය ද එම තීරණය වෙනස් කරමින් පාකිස්තාන හා එක්සත් අරාබි එමීර් රාජ්‍යයේ ක්‍රිකට් සභාපතිවරු ඊයේ අවසන් එකඟතාවකට පැමිණියහ.
ඒ අනුව පෙබරවාරි 23 වැනිදාට යෙදී ඇති ඉන්දීය – පාකිස්තාන ක්‍රිකට් තරගය දිවා – රාත්‍රී තරගයක් ලෙස ඩුබායි ක්‍රීඩාංගණයේදී පැවැත්වේ. දෙමුහුන් ආකෘතියකින් පැවැත්වෙන මෙම තරගාවලියේ පාකිස්තානය සිය පළමු තරගය පෙබරවාරි 19 වැනිදා නවසීලන්තය සමඟ කරච්චි ජාතික ක්‍රීඩාංගණයේදී පැවැත්වෙනු ඇත. බංග්ලාදේශ – නවසීලන්ත හා පාකිස්තාන – බංග්ලාදේශ තරග ගඩාෆි හා රාවල්පින්ඩි ක්‍රීඩාංගණවල පැවැත්වීමට කටයුතු යොදා තිබේ.
එයට අමතරව මූලික වටයේ ඇෆ්ගනිස්තානය, ඔස්ට්‍රේලියාව, එංගලන්තය හා දකුණු අප්‍රිකාව සහභාගි වන තරග පාකිස්තානයේදී පැවැත්වීමට කටයුතු යොදා ඇත. අවසන් පූර්ව වටයට හා අවසන් මහා තරගයට ඉන්දියාව සුදුසුකම් ලැබුවහොත් එම තරග ඩුබායිහිදී පැවැත්වෙන අතර, එසේ නොවුණහොත් එම තරගද පාකිස්තානයට ලැබෙනු ඇත.
මේ අතර ලබන වසරේ ඔක්තෝබර් මාසයේදී පැවැත්වෙන කාන්තා එක්දින ලෝක කුසලානයට සහ 2026 පිරිමි විස්සයි20 ලෝක කුසලාන තරගාවලියට පාකිස්තාන ක්‍රිකට් පිල ඉන්දියාවට නොයන බව කල් ඇතිව දැනුම්දී ඇති බැවින් එම තරගාවලි දෙක ද දෙමුහුන් ආකෘතියකින් පැවැත්වේ.
ඉන්දියාව හා පාකිස්තානය සම්බන්ධ ක්‍රිකට් තරගවලදී 2024 – 2027 චක්‍රය තුළ, පාකිස්තානයේ සත්කාරකත්වය දරන ඉසව්වකදී ඉන්දියාව ක්‍රීඩා කරන සියලුම තරග මධ්‍යස්ථ ස්ථානයක ක්‍රීඩා කරනු ඇති අතර, ඊට ප්‍රතිචාර වශයෙන් ඉන්දියාව සත්කාරකත්වය සපයන ඉසව්වකදී පාකිස්තාන තරග මධ්‍යස්ථ ස්ථානයක ක්‍රීඩා කෙරේ.
