මුහුදේ ගසාගෙන ගිය පෝලන්ත ජාතිකයා පොලීසියෙන් බේරාගනී

අහුන්ගල්ල මුහුදු තීරයේ දිය නාමින් සිටියදී පෙරේදා (24) දහවල් දිය රළකට හසුවී දියඹට ගසාගෙන ගිය විදේශ ජාතිකයෙකුගේ දිවි බේරා ගැනීමට අහුන්ගල්ල ජීවිතාරක්ෂක පොලිස් මුරපොළේ සේවයේ යෙදී සිටි පොලිස් නිලධාරීහු සමත් වූහ.

මෙසේ දිවි බේරා ගනු ලැබ සිටින්නේ මෙරට සංචාරයකට පැමිණ අහුන්ගල්ලේ හෝටලයක නතරව සිටින වයස අවුරුදු 64ක් වු දුලෙම්බා බාටෝස් මසීජ් නැමති පෝලන්ත ජාතිකයෙකි.

මුහුදේ ඈතට ගසා ගෙන යමින් සිටියදී බලවත් පරිශ්‍රමයක් දරා නිරුපද්‍රිතව බේරා ගෙන ගොඩබිමට රැගෙනවිත් මූලික ප්‍රථමාධාර ලබා දී ඉන් අනතුරුව ඔහු නැවතී සිටි හෝටලයේ කලමනාකාරිත්වයට භාර දුන් බව පොලීසිය පැවසීය.

පොලිස් පරීක්ෂක මනෝජ් ආරියරත්න මහතාගේ අධීක්ෂණය ඇතිව කොස්තාපල්වරුන් වන (29896) ලසන්ත, (19342) සංගීත් සහ (103992) දුලංජය යන මහත්වරු මෙම ජීවිතය බේරාගැනීමේ මෙහෙයුමට එක්ව ඇත.