වන්දනාමාන කටයුතු සඳහා ශ්‍රී ලංකාවේ සිට විදේශීය රටවලට යන බැතිමතුන් සඳහා සාධාරණ මිලකට ගුවන් ගමන් ප්‍රවේශ පත්‍ර නිකුත් කිරීමට රජය යම් වැඩපිළිවෙළක් අනුගමනය කරන ලෙස වන්නි දිස්ත්‍රික් පාර්ලිමේන්තු මන්ත්‍රී සෙල්වම් අඩෙයිකලනාදන් අගමැතිනී හරිනි අමරසූරිය මෙණෙවියගෙන් 23 දා ඉල්ලීමක් කොට තිබේ.
මන්ත්‍රීවරයා කොළඹදී හින්දු සාමිවරුන් පිරිසක් සමඟ අගමැතිනිය හමුවූ අවස්ථාවේදී මෙම ඉල්ලීම සිදු කොට තිබේ.
බෞද්ධයින් දඹදිව වන්දනාවේ යාමේදී හා හින්දු බැතිමතුන් වෙලන්කන්නි, තිරුපති හා සබරිමලෙයි වන්දනාවට යාමේදී ගුවන් ගමන් ප්‍රවේශ පත්‍රවල මිල අධික නිසා පීඩාවට පත්වන බව මන්ත්‍රීවරයා හා හින්දු සාමිවරුන් පිරිසක් අගමැතිනිය හමු වූ අවස්ථාවේදී ප්‍රකාශ කොට තිබේ.
ඉස්ලාම් භක්තිකයින් මක්කම වන්දනාවේ යාමේදීද මෙම අපහසුතාවට මුහුණ දෙන නිසා ඒ වෙනුවෙන්ද සහන ක්‍රියාත්මක විය යුතු බව සෙල්වම් අඩෙයිකලනාදන් මන්ත්‍රීවරයා අගමැතිනියට පෙන්වා දී තිබේ.
මේ සාකච්ඡාවේදී මන්ත්‍රීවරයා මන්නාරමේ ජනතාවට හා පොදුවේ උතුරු ප්‍රදේශයේ ජනතාවට මුහුණ දීමට සිදුව ඇති ගැටලු රැසක් පිළිබඳව ද අගමැතිතුමිය සමඟ කරුණු සාකච්ඡා කොට තිබේ.
