ඊශ්‍රායල – හමාස් යුද ගැටුම් හේතුවෙන් යේසුස් ක්‍රිස්තුස් වහන්සේගේ උපත සැමරෙන අසිරිමත් නත්තල් දිනයේදී යේසු බිලිඳා උපන් ඊශ්‍රායලයේ බෙත්ලෙහෙම්පුරය මේ වසරේදිත් දැඩි පාළු ස්වභාවයක් ඉසිලූ බව විදෙස් මාධ්‍ය වාර්තා කළේය. පසුගිය වසරේදී මෙන්ම මෙවරත් බෙත්ලෙහෙමේ නත්තල් උත්සව අවලංගු කර තිබූ බවත්, එය සැරසිලි සහ බැතිමතුන්ගෙන් හුදෙකලා වූ නගරයක් ලෙස පැවැති බව විදෙස් මාධ්‍ය වැඩිදුරටත් වාර්තා කළේය. යුද්ධය, ගුවන් ප්‍රහාර, සීමා තහංචි, මුර කපොලු සහ අධි ආරක්ෂාව හේතුවෙන් බෙත්ලෙහෙම අවට වෙසෙන පලස්තීනුවන්ටද නගරයට ඇතුළුවීම තහනම් කර තිබූ විදෙස් මාධ්‍ය සඳහන් කළේය. ඊශ්‍රායලය විසින් අත්පත් කරගත් බටහිර ඉවුරේ නත්තලට දින දෙකකට පෙර නත්තල් දේව මෙහෙයක් පවත්වා ඇතැයිද, එහිදී ප්‍රධාන දේශනය මුන්තර් අයිසැක් පියතුමා විසින් සිදු කරනු ලැබූ බවත්, එම දේශනයේ තේමාව වී ඇත්තේ ‘යේසුතුමා තවමත් සුන්බුන් අතර‘ බවත් විදෙස් මාධ්‍ය වාර්තා කළේය. ලොව දසත යේසුස් ක්‍රිස්තුස් වහන්සේගේ උපත සමරද්දී බෙත්ලෙහෙම අවට බැතිමතුන් කනගාටුවෙන් යුතුව නිහඬව කාලය ගත කළ බව ද විදෙස් මාධ්‍ය සඳහන් කළේය. ඊශ්‍රායලයේ ජෙරුසලම් නුවරට කිලෝමීටර් 10ක් දුරින් පිහිටි මේ පූජනීය නගරයේ නත්තල වෙනුවෙන් සාම්ප්‍රදායිකව සරසන අඩි 52ක් උසැති ලෝක ප්‍රකට නත්තල් ගස දෙවැනි වසරටත් දකින්නට නොලැබුණු බවත් වාර්තා වේ.
63
කලින් පුවත
කාටූන
මීලඟ පුවත
