දින 16ක් තිස්සේ යාත්‍රා කරලා
මඟදී මියගිය හයකගේ සිරුරු මුහුදට දමලා
ත්‍රිකුණාමලයේ ජමාලියා මුස්ලිම් විදුහලේ රඳවති
නීති විරෝධී ලෙස දේශසීමා උල්ලංඝනය කරමින් මියන්මාර ජාතිකයන් 103 දෙනකු සරණාගතයන් ලෙස ශ්‍රී ලංකාවට සංක්‍රමණය කරවීමට සංවිධානය කළ බව කියන මියන්මාර් ජාතිකයන් 12 දෙනකු ලබන 31වැනිදා තෙක් රක්ෂිත බන්ධනාගාරගත කරන ලෙස ත්‍රිකුණාමලය වැඩබලන මහේස්ත්‍රාත් අබ්දුල් සලාම් සාහිර් මහතා ත්‍රිකුණාමල වරාය පොලීසියට නියම කළේය .
මෙම සැකකරුවන් වීසා නැති විදේශිකයන් රඳවා තබන මිරිහාන රැඳවුම් මධ්‍යස්ථානයේ රඳවා සුදුසු ක්‍රියාමාර්ගයක් ගැනීම සඳහා ආගමන විගමන පාලක ජෙනරාල් වෙත යොමු කරන ලෙස ද අධිකරණයෙන් පොලීසියට නියෝග නිකුත් විණී.
එහෙත් මිරිහාන රැඳවුම් මධ්‍යස්ථානයට බස් රථ දෙකකින් රැගෙන ගිය මෙම පිරිස සම්බන්ධයෙන් ආගමන විගමන විමර්ශන අවසන් නොවීම හේතුවෙන් යළිත් ත්‍රිකුණාමලයට රැගෙන විත් තිබේ. ඒ අනුව මොවුහු දැනට ත්‍රිකුණාමලයේ ජමාලියා මුස්ලිම් විද්‍යාලයේ රඳවනු ලැබ සිටිති.
ඒ අනුව, මියන්මාර් ජාතික පිරිමි 27 ක් සහ කාන්තාවන් 27ක් අධිකරණයට ඉදිරිපත් කර තිබූ අතර මෙම පිරිස සමඟ කුඩා පිරිමි ළමුන් 26 සහ කුඩා ගැහැනු ළමයින් 23 සිටින බව පොලීසිය අධිකරණයට කරුණු වාර්තා කර තිබිණි. මෙම දරුවන් ඔවුන්ගේ මවුපියන්ට භාරදෙන ලෙස ද මහේස්ත්‍රාත්වරයා පොලීසියට නියෝග කළේය.
ත්‍රිකුණාමල වරාය පොලිස් ස්ථානාධිපති ප්‍රධාන පොලිස් පරීක්ෂක ආර්. ඒ. ජේ. එස්. රණවීර මහතා, සැකකරුවන් හා ඒ වාර්තා දෙකක් මඟින් මෙම සිද්ධියට අදාළව අධිකරණයට කරුණු ඉදිරිපත් කළේය.
මියන්මාර් ජාතිකයන් රැගෙන පැමිණ ඇති යාත්‍රාව නඩු භාණ්ඩ ලෙස රඳවා ගැනීමට වරාය පොලීසියට පහසුකම් නැති බව ද පොලීසිය අධිකරණයට කරුණු ඉදිරිපත් කළේය. එම කරුණු සැලකිල්ලට ගත් වැඩ බලන මහේස්ත්‍රාත්වරයා එම යාත්‍රාවේ නීති විරෝධී ද්‍රව්‍ය ඇත්දැයි පරීක්ෂා කර බලා එම යාත්‍රාව ත්‍රිකුණාමල නාවික ආඥාපති භාරයේ තැබීමට නියෝග කළේය .
මෙම පිරිසට අහම් මානුෂීය සම්පත් මධ්‍යස්ථානය (AHRC), ත්‍රිකුණාමල දිස්ත්‍රික් කාන්තා ජාලය (TDWN) ඇතුළු සිවිල් සංවිධාන ආහාර ඇතුළු පහසුකම් සලසා දෙනු ලැබිය.
මෙම පිරිස රැගත් බහුදින යාත්‍රාව පසුගිය 19 වැනිදා මුලතිව්, මුල්ලිවයික්කාල් වෙරළ සීමාවට පැමිණ තිබියදී සොයා ගන්නා ලද්දේ ප්‍රදේශයේ ධීවරයන් විසිනි. දින තුනක් තිස්සේ නිරාහාරව සිටි එම පිරිසට ආහාරපාන මෙන්ම වෛද්‍ය පහසුකම් ද ලබාදීමට පියවර ගත්තේය. අනතුරුව එම යාත්‍රාව ත්‍රිකුණාමලය වෙත රැගෙන යාමට නාවික හමුදාව පියවර ගත්තේය. ප්‍රශ්න කිරීමේදී හෙළිවන්නේ දින 16ක් පුරාවට මියන්මාරයේ සිට මෙම පිරිස පැමිණ ඇති බවය. බහුදින යාත්‍රා තුනකින් මෙම පිරිස ගමන් කර ඇති බවත් යාත්‍රා දෙකක් අතරමඟ දී කාර්මික දෝෂයට ලක්වීම හේතුවෙන් එම යාත්‍රාවල සිටි පිරිසද මෙම යාත්‍රාවට ගොඩකරගෙන ඇති බවත් අනාවරණය වී ඇත. මෙම ගමනේදී 06 දෙනකු මියගොස් ඇත. ඒ අයගේ සිරුරු මුහුදට දැමීමට පියවරගෙන ඇති බව ද අනාවරණය විය.
ත්‍රිකුණාමලය විශේෂ
ඒ. ටි. එම්. ගුණානන්ද අමරජීව
