වරින් වර අභියෝග රැසකට ලක්වෙමින් පැවති ලංකා පොස්පේට් සමාගමේ නව සභාපතිවරයා ලෙස ආනන්ද ප්‍රේමකුමාර මහතා පත් කර ඇත.
ලංකා පොස්පේට් සමාගම වර්තමාන රජය යටතේ කර්මාන්ත හා ව්‍යවසායකත්ව සංවර්ධන අමාත්‍යාංශය යටතේ ක්‍රියාත්මක වේ.
ආහාර විද්‍යාව හා තාක්ෂණය (Food science and Technology ) පිළිබඳව විශේෂඥයකු වන ආනන්ද ප්‍රේමකුමාර මහතා පේරාදෙණිය විශ්ව විද්‍යාලයේ කෘෂි විද්‍යාව පිළිබඳව විශේෂ උපාධිය හිමිකරගෙන තිබෙන අතර කුරුණෑගල සඳලංකා මධ්‍ය මහා විද්‍යාලයේ කීර්තිමත් ආදි ශිෂ්‍යයෙකි.
වසර 33 ක කෘෂිකර්ම ක්ෂේත්‍රයේ හසල අත්දැකීම් සහිත ප්‍රේමකුමාර මහතා පෞද්ගලික අංශයේ වසර 8ක් හා කෘෂිකර්ම දෙපාර්තමේන්තුවේ වසර 20 ක දීර්ඝ සේවා කාලයක් සහිත පලපුරුදු නිලධාරියෙක් වන අතර JICA, ලෝක බැංකුව වැනි විදේශ ආධාර ව්‍යාපෘතිවලද වසර 5ක වෘත්තීය අත්දැකීම් වලින් සමන්විත වෙයි.
ලංකාවේ ජාතික සම්පතක් වන පොස්පේට් සම්පත නිවැරදි ආකාරයකට හසුරවමින්, අමාත්‍යාංශය සමඟ එක්ව කෘෂිකර්මාන්තයට අදාළ අවශ්‍යතා සපුරාලන වඩාත් ඵලදායි ආයතනයක් ලෙස ලංකා පොස්පිට් සමාගම නව මානයකට ගෙන ඒම සඳහා මෙහෙයවීම තම අරමුණ බව නව සභාපති ආනන්ද ප්‍රේමකුමාර මහතා පැවසීය.
