රුපියල් ලක්ෂ පහකට ආසන්න මුදලකට අලෙවි කිරීමට සූදානම් කර තිබූ මුව අං තට්ටු හා ආරක්ෂිත බෙල්ලන් දෙදෙනෙකු සමඟ සැකකරුවන් තිදෙනෙකු කුරුණෑගල, කුඹුක්ගැටේ ප්‍රදේශයේ දී ගුවන් හමුදා බුද්ධි තොරතුරකට පොලිස් විශේෂ කාර්ය බළකායේ කුරුණෑගල නිලධාරින් හා කරුවලගස්වැව වනජීවී නිලධාරීන් ඒකාබද්ධව සිදු කළ මෙහෙයුමකින් පෙරේදා (14) අත් අඩංගුවට ගැනීමට හැකිවූ බව එස්.ටී.එෆ්. ප්‍රකාශ කරයි.
මෙලෙස අත්අඩංගුවට ගෙන තිබුණේ කුරුණෑගල, කුඹුක්ගැටේ, නෙළුම්වැව ප්‍රදේශයේ පදිංචිකරුවන් පිරිසක් බව පවසයි. අත්අඩංගුවට ගත් සැකකරුවන් සමඟ ඔවුන් අදාළ දෑ ප්‍රවාහනයට යොදා ගත් ටාටා බට්ටා ලොරි රථයක් ද මෙම මෙහෙයුමේ දී තම භාරයට ගැනීමට පොලිස් විශේෂ කාර්ය බළකායේ කුරුණෑගල කඳවුරු නිලධාරීන් හා කරුවලගස්වැව අඩවි වනජීවි කාර්යාල නිලධාරීන් කටයුතු කර තිබුණි. ගුවන් හමුදා මීරිගම කඳවුරේ නිලධාරීන් විසින් ලබා දුන් බුද්ධි තොරතුරක් මත අදාළ වැටලීම සිදුකර තිබූ අතර මෙහිදී එක් මුව අං තට්ටුවක් රුපියල් ලක්ෂය බැඟින්, අං තට්ටු තුනක් අලෙවි කිරීමට සූදානම් කර තිබූ බවත්, විශේෂිත බෙල්ලන් දෙදෙනෙකු අලෙවි කිරීමටත් සූදානම් කර තිබූ බවත් එහිදී එය ලක්ෂ දෙකකට මිල කරමින් අලෙවි කිරීමට සූදානම් කර තිබූ බවත් වැටලීම සිදු කළ නිලධාරීහු පවසති.
මෙම වැටලීම සිදු කිරීමෙන් පසු ලැබුණ තවත් තොරතුරක් මත නැවතත් කුඹුක්ගැටේ, නෙළුම්වැව ප්‍රදේශයේ නි‍ෙවසක් පරීක්ෂා කර සිදු කළ මෙහෙයුමකින් බෝර 12 ගිනි අවියට සමාන ගිනි අවි සෑදීමට ගන්නා අච්චු හා එයට යොදා ගන්නා බටයක් ද අදාළ ස්ථානයේ හිමිකරු ද අත්අඩංගුවට ගැනීමට හැකි වූ බව වැටලීමට එක්වූ නිලධාරීහු පවසති.
මෙම සැකකරුවන් සියලු දෙනා, අදාළ නඩු භාණ්ඩ සියල්ල සමඟ වැටලීමට එක්වූ නිකවැරටිය වනජීවි කාර්යාලට ලබා දීමට කටයුතු තිබුණි. මෙලෙස අත්අඩංගුවට ගැනුණ සැකකරුවන් රුපියල් ලක්ෂය බැඟින් වූ වනජීවී ඇපයක් මත මුදා හැරීමට කටයුතු කළ අතර අධිකරණයෙ පෙනී සිටීමට ඉදිරි දිනයක් ලබා දීමට වනජීවී නිලධාරීන් කටයුතු කර තිබුණි.
පුත්තලම අතිරේක – හිරාන් ප්‍රියංකර ජයසිංහ
