වීරකැටිය පොලිස් වසමට අයත් බැදිගම, තිරාවල ප්‍රදේශයේ පාලු ඉඩමක් අසල අතහැර දමා ගොස් තිබූ මෝටර් රථයේ අංකය ව්‍යාජ අංකයක් බවට තහවුරු වී ඇතැයි පොලිසිය පවසයි .
මෙම මෝටර් රථයේ චැසි අංකය සහ එන්ජින් අංකය මකා දමා ඇති බවට අනාවරණයවූ බවද පොලිසිය පවසයි.
අතහැර දමා ගොස් තිබූ මෝටර් රථයේ ඉදිරිපස තිබූ ලේ පැල්ලම් වැනි සලකුණු දෙකක්ද අපරාධ ස්ථාන පරීක්ෂණ නිලධාරින් විසින් සොයාගෙන තිබේ.
වීරකැටිය පොලිස් ස්ථානාධිපති පොලිස් පරීක්ෂක එන්.බී. විජේතුංග මහතාට ලැබුණු තොරතුරක් මත ඉකුත් 10 වැනිදා රාත්‍රී බැදිගම තිරාවල ප්‍රදේශයේ අතුරු මාර්ගයක දමාගොස් තිබූ හිමිකරුවෙකු නොමැති මෙම සුදු පැහැති මෝටර් රථය සොයා ගෙන තිබිණි.
මෝටර් රථයේ ලියාපදිංචි අංකය කඩවත ප්‍රදේශයේ කාන්තාවකට අයත් එකක් බවට සොයාගත් අතර එම අංකය නිල් පැහැති වෙනත් වැගන් ආර් වර්ගයේ මෝටර් රථයක අංකයක් බවට අනාවරණය වී තිබේ.
පොලිස් නිල සුනඛ අංශයේ නිලධාරින් සිදු කළ පරීක්ෂාවකදී නිල සුනඛයා මෝටර් රථය තිබූ ස්ථානයේ සිට වීරකැටිය – තංගල්ල මාර්ගයේ මාරගස් හන්දිය අසල බස් නැවතුම්පොළ අසලට පැමිණ නතර වී ඇති අතර ඒ අනුව රථය ගෙනැවිත් දැමූ පුද්ගලයා එය ගෙනැවිත් දමා පා ගමනින් බස් නැවතුමට පැමිණ ඇති බවට කරුණු අනාවරණයවූ බව පොලිසිය පවසයි.
මෝටර් රථයේ හිමිකරු හෝ එය ගෙනැවිත් දැමූ පුද්ගලයා මේ දක්වා සොයාගෙන නැත. මෝටර් රථය කිසියම් අපරාධයකට සම්බන්ධ එකක් වියහැකි බවට පොලිසිය සැක කරයි. වීරකැටිය පොලිසියේ අපරාධ විමර්ශන අංශය සිද්ධිය ගැන වැඩිදුර පරීක්ෂණ පවත්වයි.
තංගල්ල – බන්දුල පද්මසිරි
