පසුගිය දින කිහිපයේදී ශ්‍රී ලංකාවට බලපෑ අයහපත් කාලගුණයෙන් අවතැන් වූ මහනුවර දිස්ත්‍රික්කයේ තෝරාගත් පවුල් 500ක් සඳහා අත්‍යවශ්‍ය වියළි ආහාර ද්‍රව්‍ය බෙදාදීම සිදු කරන ලදි.
මෙහිදී මහනුවර දිස්ත්‍රික්කයේ පූජාපිටිය, හාරිස්පත්තුව, අකුරණ, ගලගෙදර, පාතදුම්බර, කුණ්ඩසාලේ, තෙල්දෙණිය, හේවාහැට, නාවලපිටිය, සෙංකඩගල, යටිනුවර, උඩුදුම්බර, උඩුනුවර, නුවර, ගම්පොල යන සියලු ප්‍රදේශ නියෝජනය වන ආකාරයට මෙම අත්‍යවශ්‍ය සහන සැපයීමේ වැඩසටහන මහනුවර දිස්ත්‍රික්කයේ ජාතික ජනබලවේගයේ පාර්ලිමේන්තු මන්ත්‍රීවරුන්ගේ සහ ආසන නියෝජිතයන්ගේ ඉල්ලීම පරිදි සිදු කරන්නට විය.
ශ්‍රී ලංකාවේ සමාජ ආර්ථික ස්ථාවරත්වය ඇති කිරීමට මෙන්ම මෙවන් හදිසි ආපදා අවස්ථාවන්වලදී විපතට පත්වන ජනතාවට නිරතුරු සහයෝගය සපයන හොංකොං ශාක්‍යමුනි සංස්කෘතික පදනමේ අධ්‍යක්‍ෂ ආචාර්ය ක්වොක් ශියු මින්ග් මැතිතුමා ඇතුළු දානපතියන් විසින් (Hon. Dr. Kwok Shiu Ming, The International Centre of Sakyamuni Cultural Limited) මෙම සත්කාර්ය සඳහා ආධාර ලබාදෙන ලදි.
ඒ අනුව මොළගොඩ කොටමුදුන්ගල රාජමහා විහාරාධිකාරි ජ්‍යෙෂ්ඨ කථිකාචාර්ය මොරගස්වැවේ විජිත හිමියන් විසින් මෙම වැඩසටහන සම්බන්ධීකරණය කරන ලදි. එසේම බොක්කාවල පොලිස් ස්ථානාධිපති ප්‍රධාන පොලිස් පරීක්‍ෂක ජනක සංජීව මැතිතුමන් ඇතුළු බොක්කාවල පොලිසියේ සියලු නිලධාරි මහත්ම මහත්මීන්ගේ සහයෝගය ද මෙම සත්කාර්යය සඳහා ලබාදෙන ලදි.
ජාතික භික්‍ෂු පෙරමුණ, අදිටන ක්‍රියාකාරීත්වය, නැණස අධ්‍යාපන ආයතනය ඇතුළු සංවිධාන මෙම සත්කාර්ය සාර්ථක කර ගැනීමට අවශ්‍ය සහය ලබාදෙන ලදි.
