උපන් ගෙයි ඩිජිටල් වූවෝ වනාහි 1996 සහ 2010 යන කාල පරාසයේ උපන්නහුය. ඔවුහු සිය බිහිදොරේ සිටම ඩිජිටල් කදම්බය මීට මොළවාගෙන ආහ. එය ලෝක ශිෂ්ටාචාරය විෂයෙහි නව පරම්පරාවකි. ඩිජිටල් යුගය ආරම්භයේදී ආධුනිකයන් වූ පෙර පරම්පරාව මෙන් නොව මේ පරම්පරාව කර ඔසවා ලෝකය දෙස බලන විටම සියල්ල යතුරු පුවරුවේ මිඩංගු වී තිබුණේය. එතැන් සිට ලෝකයේ කතාව ගලා ගියේ වෙනත් ආරකටය. එවන් ලෝකයක් සුබ අසුබ විග්‍රහයක් සඳහා නොව එසේ උදාවූ ලෝකයේ ලබා ගත හැකි වාසි සම්බන්ධයෙන් මේ තීරුව අද උත්සුක වන්නේය.
ශ්‍රී ලංකාව ඩිජිටල් කිරීම සඳහා වූ න්‍යාය විග්‍රහයන් අටෝ රාශියක් අප අසා ඇත. ඒ සඳහා වූ කෙටුම්පත් ගණනාවක් ද, ප්‍රතිපත්ති සැලසුම් සමුදායක් ද තිබේ. වැඩේ එතැනින් එහාට පත්තු නොවීම හේතුවෙන් තවම බොහොමයක් කාරණා ඇත්තේ, එකදහස් නවසිය පනහේ සමයේය. පොලිස් දඩ කොළය උදාහරණය වන්නේය. පොලීසියේ රාලහාමි වාහනය නවතා දඩ කොළයක් ලබා දෙන්නේය. අධිවේගයේ මත්තලින් බැස කතරගම යන පිරිසක් වෙත ඒ ආකාරයට දඩකොළයක් ලැබුණු විට, පළාතේ පොලීසියට යා යුතුය. එතැනට ගොස් දඩ කොළයක් ලියා ගත යුතුය. එය රැගෙන තැපැල් කන්තෝරුවට යන විට දහවල් 12 සිට 1 දක්වා දිවා ආහාරය සඳහා එය වසා ඇත. සන්ධ්‍යාවේ නම් පහෙන් පසු තැපැල් කන්තෝරුව වසා තිබේ. දඩය ගෙවා තැපැල් කන්තෝරුවෙන් කොළය ගෙන යළි පොලීසි යා යුතුය. රථ වාහන අංශයෙන් ලයිසන් එක රැගෙන යා හැකිය. මේ රස්තියාදුව ගැන මහජන මතයක් ඇතිවී වසර පහළොවකට අධිකය. ඔය ආකාරයට පැය දෙක තුනක් දඩ කොළයක් වෙනුවෙන් ගෙවීමට සිද්ධ වීම, එකම වරදට දඬුවම් දෙකක් ලබාදීමකි. මෙම යන්ත්‍රණය ඩිජිටල් මාවතක රැගෙන යන ලෙස කළ ඉල්ලීම් තිබියදී මීට වසරකට පමණ පෙර ඊට පිළිතුරක් ලැබිණි. ඒ වූ කලී දඩ කොළය ගෙවීමැ සඳහා පැය විසිහතරම තැපැල් කන්තෝරු විවෘත කර තැබීමය.
ජේන් ඉසෙඩ් පරම්පරාව ද දැන් වයස අවුරුදු දහ අටක පමණ මධ්‍යන අගයකට ලොකු මහත් වී තිබේ. යළිත් වැඩේ පරණ පාරේම කරකැවෙනවා මිස ඩිජිටල් විසඳුමක් ලබාදීමේ ශක්‍යතාවක් රාජ්‍ය යන්ත්‍රණයට ලැබී නැත. ස්මාට් දුරකතනයක් සහිතව බොහෝ පිරිසක් සිටිනා බැවින් පොලීසිය, රාලහාමි සහ රියැදුරා යන පාර්ශ්ව මේ හරහා පහසුවෙන් ඒකාබද්ධ කර, රථ වාහන දඩය සඳහා ක්‍රමවේදයක් සෑදීමට මාස හයක් ප්‍රමාණවත්ය. එසේ වුවද තවම දඩ කොළය යන්නේ පරණ පාරේය. ඔය ආකාරයට දඩයට රස්තියාදු වීමට වඩා, රාලහාමිගේ දවසේ ගතමනාව සඳහා දඩය ලබාදී ඒම පහසුය. දඩයෙන් බාගයට, ඒ වැඩේ කර ගත හැක්කේ බැවින් වැඩේ තවත් ලාභය.
ඩිජිටල් අවකාශය යනු පුද්ගල ගනුදෙනු ආදියෙන් තොරව සිද්ධ වන්නේ හෙයින් එයට දූෂණ අදාළ නැත. සියල්ල යාන්ත්‍රිකය. තොරතුරු තාක්ෂණය සම්බන්ධයෙන් වූ ප්‍රතිපත්ති ප්‍රකාශයක් මාලිමාව සකස් කරන ලද්දේ ජනපති ඡන්දයට වසර දෙකකට පමණ පෙරය. එවැනි නව්‍ය දැක්මක් ශ්‍රී ලංකාවට අවශ්‍ය වූයේ කාර්යයන් වේගවත් කිරීම, දූෂණ අවම කිරීම යන කාරණා දෙක ප්‍රධාන කර ගෙනය.
දේශපාලන පක්ෂ යන්ත්‍රණයක් එවැනි වූ නව්‍ය රටාවක් සමඟ ගනුදෙනු කිරීමට යන්නේම, රටේ ප්‍රධාන ප්‍රශ්න සඳහා කයිය දෙනවාට වඩා විසඳුම් මේ තැන්හි ඇත්තේ බැවිනි, සමස්තයක් ලෙස සියලු දේශපාලන සංවිධාන, බලපෑම් කණ්ඩායම් ඩිජිටල්කරණය සම්බන්ධයෙන් එකඟතාවක සිටින්නේය. ජනාධිපතිවරයා විසින් ඒ සඳහාම වූ උපදේශකවරයෙක් පත් කර ඇත්තේය. ශ්‍රී ලංකාව ඩිජිටල්කරණය සඳහා වූ සමස්ත සැලැස්ම සඳහා සිය සේවය නොමිලේ ලබාදීමට කැපවී සිටින ආචාර්ය හාන්ස් විජේසූරිය සඳහා රටක් ලෙස අප කෘතඥ විය යුත්තේය. හෙතෙම උසුලන ලද්දේ විසල් තනතුරකි. ඒ සඳහා ලබන ලද වැටුප ද ඒ හා සමාන බරට තිබෙන්නට ඇත. සියල්ල හැර පියා, මේ රටේ ඩිජිටල්කරණය වෙනුවෙන් ඔහු දැන් කැපව ඇත.
ශ්‍රී ලංකා රාජ්‍යය පිළිබඳව ජනතාවගේ මතය සෑහෙන පමණ කලකිරීමට පත්ව ඇත්තේ එහි ඇති ඉහ වහා ගිය දූෂණ සහ අකාර්යක්ෂමතාව හේතුවෙනි. මේ අවස්ථාවේ රටේ ඇති පළමු ප්‍රශ්නය එය මිස හාල්, පොල් නොවේ. රාජ්‍යය කෙරෙහි ජනතා විශ්වාසය බිමට සමතලා වූ කල එය ආරෝහ පරිණාහ මළ මිනියකි. දැන් පණ අදිමින් සිටින්නේ බැවින්, රාජ්‍යය සුවපත් කිරීම උදෙසා අප පළමු වෑයම දැරිය යුතුය. එය වෙනස් කතාවකි. පාරට පැන පෙළපාළි මෙහෙයවා එතැනට පැමිණිය නොහැකිය. ආණ්ඩුකරණය සිල්ලර ආකාරයට විවේචනය කර බලය දිය කිරීම ද පරණ ගංගාවේමැ වෙනත් පාරුවකින් යෑම මෙන්ය.
හාල් ප්‍රශ්නය සඳහා දැන් අපට ඇත්තේ විසඳුම් තුනකි. එකක් රටින් ගෙන්වීමය. අනික මිල නියාමනයය. තෙවැන්න මෝල් පරීක්ෂාවය. ඩිජිටල්කරණය සඳහා රටේ කෘෂිකර්මාන්තය භාජන වී ඇත්තේ නම්, ඔය කිසිවක් අවශ්‍ය නැත. වැපිරීමේ සිට සියල්ල කළමනාකරණය වන්නේ අවසාන පාරිභෝගික අවශ්‍යතාවට අනුවය. තොග නිදහස් වන්නේ ද එසේය. සියල්ල දත්ත ගබඩාවක ඇත්තේ බැවින් එක මෝලකට අධිකාරියෙන් දෙන්නා බැගින් යොදා හොර ඇල්ලීමේ වුවමනාවක් ද නොමැත. තමන් සතුව එකදු වාහනයක් හෝ නොමැතිව ප්ලැට්ෆෝම් එකක් සාදාගෙන, ඇප් එකක් මඟින් ටැක්සි සේවා පවත්වාගෙන යන ආයතන කිහිපයක් ඇත්තේය. ගමනක් යෑම සඳහා අවශ්‍ය වූ විට, යෙදවුම මාර්ගයෙන් යායුතු ස්ථානය සන් කළ විට, අසල සිටින රියදුරා ගෙදර බලා එන්නේය. හාල් සඳහා ද මේ මොඩලය අපට ඩිජිටල්කරණයෙන් සිදු කළ හැකිය. වී අලෙවි මණ්ඩලය වනාහි ගබඩා ඇතිකර ඉඩ පහසුකම් සලසන ස්ථානයක් නොවේ. වාහන සඳහා වූ ඇප් එක ක්‍රියාත්මක කරන ආයතනය හා සම වන්නේය.
දියවී යන රාජ්‍යය සඳහා පණ දිය හැකි එක් ක්‍රමයක් වන්නේ මේ ආකාරයට ඩිජිටලයිශේෂන් සඳහා යෑමය.
