වනසත්ත්ව හා වෘක්ෂලතා ආඥා පනතට අනුව ආරක්ෂිත නොවන සතුන් කාණ්ඩයට ගැනෙන රිළවා, ඌරා, ඉත්තෑවා, හාවා, වඳුරා වැනි සතුන් ගොවි බිමකදී පාලනයට බාධාවක් නැතැයි නීතිඥ එම්.ආර්.එම්. කරුණාරත්න බණ්ඩා මහතා පවසයි. කෘෂිකර්ම ඇමැතිවරයා ප්‍රකාශ කර තිබෙන්නේ ආඥා පනතේ සඳහන් කාරණයක් මිස ඊට පටහැණි යමක් නොවන බව… පරිසරවේදීන් තේරුම්ගත යුතුව ඇතැයි ද ඒ මහතා කීය. මෙයට අදාළ නීතිය 2009 අංක 22 පනතින් සංශෝධනය වූ වනසත්ත්ව හා වෘක්ෂලතා ආරක්ෂක පනත බවත් එහි උපලේඛන කිහිපයක් ඇති බවත් කී ඒ මහතා එහි පළමු උපලේඛනය යටතේ ආරක්ෂිත නොවන සතුන් ගැන විස්තර කර ඇතැයි ද අවධාරණය කළේය.
ආරක්ෂිත නොවන සතුන් ගණයට ඌරා, ඉත්තෑවා, රිළවා, හාවා, වඳුරා අයත් බවත් එම සතුන් මැරීමට නොහැක්කේ අභය භූමියක හෝ පොදු ස්ථානයකදී පමණක් බවත් කරුණාරත්න මහතා කීය.
නමුත් එවැනි සතකුගේ මස් ප්‍රවාහනය, ප්‍රදර්ශනය සහ විකිණීම වළක්වා තිබෙන බවත් සංශෝධනයක් අවශ්‍ය වන්නේ ඒ සඳහා බවත් කී නීතිඥවරයා පනතේ එක වගන්තියක් වෙනස් කිරීමෙන් ප්‍රශ්නයට විසඳුම් සෙවිය හැකි යැයි ද ප්‍රකාශ කළේය.
අසේල කුරුළුවංශ
