හංවැල්ල නගරයේදී ඉකුත් 02 වැනිදා දහවල් මොනරාගල සිට කොළඹ බලා ධාවනය වෙමින් තිබූ පෞද්ගලික බස්රථයක් කාන්තාවක් යටකර, විදුලි කණුවක් කඩාගෙන ගොස් බෝක්කුවක් අසල නැවතී කාන්තාව මරණයට පත් කිරීම, විදුලි විසන්ධිය, විදුලි කණුවක රැහැන්වලට හානි කිරීමේ යන කරුණු අවිස්සාවේල්ල මහේස්ත්‍රාත් අධිකරණයට ඉදිරිපත් කිරීමෙන් අනතුරුව මහේස්ත්‍රාත් ජනක ප්‍රසන්න සමරසිංහ මහතා බස් රථයේ රියැදුරු දින 14ක් රක්ෂිත බන්ධනාගාරගත කරන ලෙස නියෝග කළේය.
සිද්ධියෙන් මියගොස් ඇත්තේ වග, වැලිකන්න ප්‍රදේශයේ අංක 234/ඒ, ලිපිනයේ පදිංචිව සිටි රණතුංග ආරච්චිගේ දයාවතී පෙරේරා නමැති 75 හැවිරිදි දෙදරු මවකි. ඇය දෙවැනි දින දහවල් පුවක් මල්ලක් රැගෙන හංවැල්ල නගරය දෙස සිට වනහගොඩ දෙසට නියමිත පදික වේදිකාවේ නියමිත මංතීරුවේ ගමන් කරමින් සිටියදී මොනරාගල සිට කොළඹ බලා අධික වේගයෙන් ධාවනය වෙමින් තිබූ පෞද්ගලික බස්රථයක් හංවැල්ල නගරයේදී කාන්තාවක් යටකරගෙන විදුලි කණුවක් කඩාගෙන, විදුලි විසන්ධිය, විදුලි කණුවක් කඩා දමා, විදුලි රැහැන් කැඩී යෑම සම්බන්ධයෙන් හංවැල්ල පොලීසිය අධිකරණයට කරුණු වාර්තා කළේය. මියගිය කාන්තාවගේ පශ්චාත් හදිසි මරණ පරීක්ෂණය අවිස්සාවේල්ල මූලික රෝහලේදී සිදු කිරීමෙන් අනතුරුව භූමදානයට මළ සිරුර ඥාතීන්ට භාර දීමට පොලීසියට නියෝග කළේය.
