ජාතික මට්ටමින් ජයග්‍රහණය කළ සබරගමුව පළාතේ විශේෂ අවශ්‍යතා සහිත වූවන් (ආබාධිත පුද්ගලයින්) ඇගයීමේ වැඩසටහනක්, ඉකුත් 3 වැනිදා සබරගමු පළාත් ආණ්ඩුකාර චම්පා ජානකී රාජරත්න මහත්මියගේ ප්‍රධානත්වයෙන් රත්නපුර පිහිටි පළාත් සභා ශ්‍රවණාගාරයේ දී පැවැත්විණි. මෙම ඇගයුම පළාත් සමාජ සේවා සහ පරිවාස දෙපාර්තමේන්තුව සංවිධානය කර තිබිණි.
ඒ අනුව 2024 වර්ෂයේ දියගම ක්‍රීඩාංගණයේ දී පැවති දුනු විදීමේ තරගයෙහි වාර්තාවක් පිහිටුවූ බී.ඒ. සඳරුවන් පියවංශ, සබරගමු පළාත් ආණ්ඩුකාර චම්පා ජානකී රාජරත්න මහත්මිය විසින් ඇගයුමට ලක් කර සහතික හා සම්මාන ප්‍රදානය කරනු ලැබීය. මීට අමතරව ජාතික යොවුන් ගායන තරගයේ ප්‍රථම ස්ථානය දිනාගත් චමෝදි හංසනී සිල්වා සහ 2024 වර්ෂයේ විශේෂ ආබාධිතයින්ගේ මලල ක්‍රීඩා උලෙළේ ප්‍රථම ස්ථානය දිනාගත් පාලිත රසික ගුණවර්ධන ආණ්ඩුකාරවරියගේ ඇගයුමට පාත්‍ර විය. සබරගමුව පළාතේ සමාජ සේවා අමාත්‍යාංශයේ පාලනය සහ අධීක්ෂණය යටතේ විශේෂ අවශ්‍යතා සහිත වූවන් සඳහා මධ්‍යස්ථාන 11ක් ක්‍රියාත්මකය. එම මධ්‍යස්ථානවල 500ක් පමණ නේවාසිකව සිටින අතර, රැකවරණය, ආහාර, වෛද්‍ය ආධාර, අධ්‍යාපනය, වෘත්තීය පුහුණුව ආදිය නොමිලේම ලබා දේ. එම මධ්‍යස්ථාන අතර, පැවති කාර්ය සාධන තරගාවලියේ ප්‍රථම ස්ථානය දිනූ නිසල සෙවණ, දෙවන ස්ථානය දිනූ ඕලන්දවත්ත, තෙවන ස්ථානය දිනූ රොටුව මන්ද මානසික කාන්තා පුනරුත්ථාපන මධ්‍යස්ථානය යන මධ්‍යස්ථාන ද මෙහිදී ඇගයුමට ලක් විය. මෙම අවස්ථාවට පළාත් රාජ්‍ය සේවා කොමිසමේ ලේකම් ඊ.කේ. සුනීතා, පළාත් පරිවාස හා සමාජ සේවා අමාත්‍යාංශ ලේකම් දිනීෂා රත්නායක, නියෝජ්‍ය ප්‍රධාන ලේකම් දිලිනි ධර්මදාස, රත්නපුර අතිරේක දිසාපති ගයානී අයි. කරුණාරත්න, පළාත් සමාජ සේවා කොමසාරිස් ආර්.එම්.ඩී.එල්. රත්නායක, පළාත් සමාජ සේවා නියෝජ්‍ය අධ්‍යක්ෂ කේ.එස්. හබරංකඩ යන මහත්ම මහත්මීන් ඇතුළු පිරිසක් එක්ව සිටියහ. 2024 වර්ෂයේ දියගම ක්‍රීඩාංගණයේ දී පැවති දුනු විදීමේ තරගයෙහි වාර්තාවක් පිහිටුවූ බී.ඒ. සඳරුවන් පියවංශ, සබරගමු පළාත් ආණ්ඩුකාර චම්පා ජානකී රාජරත්න මහත්මිය විසින් ඇගයුමට ලක්කර සහතික හා සම්මාන ප්‍රදානය කරනු ලැබූ අවස්ථාව මෙහි දැක්වේ.
