මහා පරිමාණ පලතුරු වගාව ප්‍රවර්ධනය කිරීම සහ වාරිමාර්ග පද්ධති වැඩිදියුණු කිරීම මඟින් ගොවීන්ට සෘජුවම ප්‍රතිලාභ ලබාදීමත්, වර්ධනය වන ගෝලීය ඉල්ලුම සපුරාලීම සඳහා ශ්‍රී ලංකාවේ පලතුරු ස්ථානගත කිරීම ඉලක්ක කර ගත් විශේෂ වැඩසටහනක් පසුගියදා පැවැත්විණි.
අනුරාධපුර දිස්ත්‍රික් ලේකම් රංජිත් විමලසූරිය මහතාගේ ප්‍රධානත්වයෙන් අනුරාධපුරයේදී මෙම වැඩසටහන පැවැත්විණි. දිස්ත්‍රික්කය පුරා විශාල පරිමාණයෙන් අපනයනය ඉලක්ක කරගත් පලතුරු භෝග වගා කිරීමේ හැකියාව මෙහිදී ගවේෂණය කළේය.
ආසියානු සංවර්ධන බැංකුවේ (ADB) මහවැලි ජල සුරක්ෂිතතා ආයෝජන වැඩසටහන (MWSIP) හරහා ශ්‍රී ලංකාවේ වාණිජ කෘෂිකාර්මික සංවර්ධනයට සහය දැක්වීමට එකඟවී තිබේ. විශේෂයෙන්ම අනුරාධපුර දිස්ත්‍රික්කයේ දැනට අඩු ඵලදායී ඉඩම්වල මහා පරිමාණ පලතුරු වගාව ප්‍රවර්ධනය කිරීම සහ වාරිමාර්ග පද්ධති වැඩිදියුණු කිරීම මඟින් ගොවීන්ට සෘජුවම ප්‍රතිලාභ ලබාදීම මෙම වැඩසටහනේ අරමුණ වී තිබේ.
මෙම ප්‍රයත්නයේ කේන්ද්‍රීය අංගයක් වන්නේ උතුරුමැද පළාත් ඇළ ව්‍යාපෘතිය (NCPCP) වන අතර එය කලාපයේ කෘෂිකර්මාන්තය සඳහා ජල ප්‍රවේශය වැඩිදියුණු කිරීමේ ප්‍රධාන කාර්යභාරයක් ඉටු කරයි. මේ අනුව වර්ධනය වන ගෝලීය ඉල්ලුම සපුරාලීම සඳහා ශ්‍රී ලංකාවේ පලතුරු ස්ථානගත කිරීම ඉලක්කයවී තිබේ.
ශ්‍රී ලංකාවේ පලතුරු අපනයනය පුළුල් කිරීමේ අවස්ථා සහ අභියෝග පිළිබඳව මෙම වැඩමුළුවේ දී සාකච්ඡා කෙරිණි. අපනයනය සඳහා හඳුනාගත් ප්‍රධාන පලතුරු වන්නේ අඹ, දෙළුම්, පේර සහ අන්නාසිය. මෙම පලතුරු සඳහා ගෝලීය ඉල්ලුම පවතින අතර නිෂ්පාදන තත්ත්වය වැඩිදියුණු කිරීම, ස්ථාවර සැපයුම සහතික කිරීම සහ වසර පුරා ලබාගැනීමේ හැකියාව පවත්වා ගැනීමේ අභියෝගයට මුහුණ දීමේ අවශ්‍යතාවය මෙහිදී අවධාරණය කෙරිණි.
මෙම අවස්ථාවට රැඹෑව, කහටගස්දිගිලිය, පලුගස්වැව, ගලෙන්බිඳුණුවැව, කැකිරාව සහ තිරප්පනේ යන ප්‍රාදේශීය ලේකම්වරුන් සහ ගොවිජන සංවර්ධන දෙපාර්තමේන්තුව, වාරිමාර්ග දෙපාර්තමේන්තුව, වනජීවී සංරක්ෂණ දෙපාර්තමේන්තුව, වන සංරක්ෂණ දෙපාර්තමේන්තුව සහ කෘෂිකර්ම දෙපාර්තමේන්තුව යන ආයතනවල ප්‍රධාන රාජ්‍ය නිලධාරීන් පිරිසක් එක්ව සිටියහ.
