මස්කෙළිය, ෆෝග්මෝර් හා ගල් කන්ද යන තේ වතුයායවලට පිවිසෙන මාර්ග දැඩි ලෙස අබලන්ව පැවතීම නිසා එම ප්‍රදේශයේ පාසල් දරුවන් හා වතු ජනතාව දැඩි ලෙස පීඩාවට පත්ව සිටිති.
නෝර්වුඩ් ප්‍රාදේශීය ලේකම් බලප්‍රදේශයේ පිහිටි ෆෝග්මෝර් හා ගල්කන්ද යන තේ වතුවල පවුල් 130ක් පමණ ජීවත් වෙති. මාර්ග හා ප්‍රවාහන පහසුකම් නොමැතිකම නිසා මෙම ප්‍රදේශයේ ජීවත් වන වතු කම්කරු ශ්‍රමික ප්‍රජාව හා පාසල් දරුවන් මගී ප්‍රවාහන බස් රථයක් ලබා ගැනීමට කි.මී.8ක පමණ දුරක් පා ගමනින් ගාඩ්මෝර් දක්වා පැමිණිය යුතුය. කුලී ත්‍රිරෝද රථයකින් ගාඩ්මෝර් දක්වා පැමිණීමට රු. 1,500ක මුදලක් අය කරන බව එම ජනතාව පවසති. වතුයායට පිවිසීමට ඇති මාර්ග අතිශය දුෂ්කර මාර්ග පද්ධතියකි. තාර දමා නැති මෙම මාර්ග වැසි දිනවල වැව් බවට පත්වන බවත්, එහි ගමන් කිරීම අතිශය දුෂ්කර බවත් ප්‍රදේශයේ ජනතාව පෙන්වා දෙති. වතුයායේ පදිංචි ගැබිනි කාන්තාවන් හා රෝගී පුද්ගලයන් මස්කෙළිය ප්‍රාදේශීය රෝහල වෙත රැගෙන ඒමට කි.මී.18ක පමණ දුරක් පැමිණිය යුතු බවත්, රෝහල වෙත පැමිණීමට ප්‍රථම ඔවුන් අතරමඟදී ඉතා අවාසනාවන්ත ලෙස මියගිය අවස්ථා කිහිපයක් ඇති බවත්, තමන් මේ රටේ නොසලකා හැර ඇති පිරිසක් බවට පත්ව ඇති බවත් ප්‍රදේශවාසීන් හා රියැදුරෝ පවසති. වත්මන් රජයේ ජනාධිපතිගේ අවධානයට ලක්වී ෆෝග්මෝර් හා ගල්කන්ද වතුයායන්වලට පිවිසෙන මාර්ග පද්ධතිය තාර අතුරා සංවර්ධනය කර දෙන ලෙස ඔවුහු ඉල්ලා සිටිති.
