මෙරට ඉතිහාසයේ සිදු වූ බිහිසුණුම ගුවන් අනතුර සිදු වී ඊයේට (04) වසර පනහක් පිරුණි. ඒ නිමිත්තෙන් නෝටන්බ්‍රිජ් විමලසුරේන්ද්‍ර ජලාශය අසල ඉදිකර ඇති ස්මාරකය අසල ගුවන් අනතුරෙන් මියගිය අය සිහි කරමින් විනාඩියක නිශ්ශබ්දතාවක් සහ පින් අනුමෝදම් කිරීමේ වැඩසටහනක් සිදු කෙරිණි. නෝටන්බ්‍රිජ් පොලිසියේ ස්ථානාධිපති ප්‍රධාන පොලිස් පරීක්ෂක කපිල විජේසූරිය මහතා, නෝටන්බ්‍රිජ් පොලිසියේ නිලධාරින් සහ නෝටන්බ්‍රිජ් ත්‍රිරෝද රථ සංගමයේ සාමාජිකයන් එක්ව මේ පින් අනුමෝදම් කිරීමේ වැඩසටහන සංවිධාන කර තිබිණි.
මාර්ටින් එයාර් ගුවන් සමාගමට අයත් ඩී.සී. 8 ගුවන්යානය 1974 වසරේ දෙසැම්බර් 4 වැනි දින ඉන්දුනීසියාවේ සුරබෙයාර් ගුවන්තොටුපළේ සිට මක්කම දක්වා පියාසර කරමින් තිබියදී එදින රාත්‍රී 10.10ට ගුවන්යානය නෝටන්බ්‍රිජ් සප්තකන්‍යා කඳු මුදුනේ ගැටී එහි ගමන් ගත් මගීන් 182 දෙනකු සහ කාර්ය මණ්ඩලයේ 9 දෙනකු ජිවිතක්ෂයට පත් විය.
ගුවන්යානයේ ටයරයක් නෝටන්බ්‍රිජ් විමලසුරේන්ද්‍ර ජලාශය අසල සිහිවටනයක් සේ තබා ඇති අතර, එම ටයරය පාමුල ගුවන්යානයේ ප්‍රධාන නියමුවා වූ හෙන්ඩ්‍රික් ලැම්, පළමු නියමුවා වූ රොබර්ට් බ්ලොම්ස්මා ඇතුළු ගුවන් කාර්ය මණ්ඩලයේ අයගේ නම් සඳහන් කර ඇත.
සිහිවටනය ඉදිරිපිට මල් තැන්පත් කර, ඉටි පහන් දල්වා මියගිය අය සිහි කරමින් විනාඩියක නිශ්ශබ්දතාවක් පැවැත්වීමෙන් අනතුරුව නෝටන්බ්‍රිජ් විදුලිපුර ශ්‍රී සුදර්මාරාමයේ විහාරාධිපති තුරුවිල ජිනරතන හිමියන් විසින් ගුවන් අනතුරෙන් මියගිය සියලු දෙනාට පින් අනුමෝදම් කළහ.
