බූස්ස බන්ධනාගාරයේ හා බන්ධනාගාර රෝහලේ පෙරේදා (03) කළ සෝදිසි මෙහෙයුමකදී තහනම් භාණ්ඩ රැසක් රැඳවියන් සතුව තිබියදී සොයාගැනීමට බන්ධනාගාර විශේෂ අංශයේ නිලධාරින් සමත්ව ඇත. විශේෂ කාර්ය බළකාය බූස්ස අධිආරක්ෂිත බන්ධනාගාර කඳවුරේ නිලධාරින්ට ලද තොරතුරකට අනුව මේ වැටලීම සිදු කර ඇත.
එහිදී බන්ධනාගාර රෝහලේ හා බන්ධනාගාර රෝහල් භූමියේ තිබී බන්ධනාගාරයේ තහනම් භාණ්ඩ වන Samsung වර්ගයේ චාජර් 05, Type C වර්ගයේ ඩේටා කේබල් 8ක්, ලයිටර් 2ක් හා පිටත ආවරණය ඉවත් කළ වයර් කැබැලි 2 ක් යොදා සකස් කරන ලද චාජරයක් අත්අඩංගුවට ගෙන වැඩිදුර විමර්ශනයට බන්ධනාගාර පාලනාධිකාරිය වෙත භාර දුන් බව කියයි.
විශේෂ කාර්ය බළකාය අණදෙන නිලධාරි ජ්‍යෙෂ්ඨ නියෝජ්‍ය පොලිස්පති නීතිඥ වරුණ ජයසුන්දර මහතාගේ නියෝග හා උපදෙස් පරිදි හම්බන්තොට කලාපය භාර ජ්‍යෙෂ්ඨ පොලිස් අධිකාරි කීර්ති විජේසිංහ මහතාගේ මෙහෙයවීම මත, සහකාර පොලිස් අධිකාරි නිශාන්ත මහතාගේ අධීක්ෂණයෙන් බූස්ස අධිආරක්ෂිත බන්ධනාගාර කඳවුරේ උප පොලිස් පරීක්ෂක කේ.කේ. සුනිල් ඇතුළු නිලධාරින් කණ්ඩායමක් විසින් පෙරේදා (03) බන්ධනාගාරයේ විශේෂ අංශයේ බන්ධනාගාර රෝහල හා බන්ධනාගාර රෝහල් භූමියේ සෝදිසි කිරීමක් සිදු කර ඇත.
ඡායාරූප – ගාල්ල දිස්ත්රික් සංචාරක
