යාල රක්ෂිතයට ඇතුළු වී එහි ස්වභාවික පරිසරයට හා ජෛව විවිධත්වයට දැඩි හානි කරමින් පරිසරය විනාශ කරමින් රක්ෂිතයේ හොර රහසේ ගංජා වගා කළ පුද්ගලයන් පස් දෙනෙකු පොලිස් විශේෂ කාර්ය බළකායේ නිලධාරීන් පිරිසක් විසින් පෙරේදා (27) අත්අඩංගුවට ගෙන තිබේ.
පොලිස් විශේෂ කාර්ය බළකාය නිලධාරීන්ට ලද තොරතුරක් මත කතරගම පොලිස් වසමේ යාල අධි රක්ෂිතයේ වෙහෙරගල ප්‍රදේශයේ දී වැටලීම් 4ක් සිදුකර ඇත.
එහිදී යාල රක්ෂිතයට අනවසරයෙන් ඇතුළු වී ස්වභාවික පරිසරයට හා ජෛව විවිධත්වයට දැඩි හානි ගෙන දෙමින් අක්කර 04ක පමණ විශාල භූමි ප්‍රදේශයක් රක්ෂිතය එළි කර එහි වගා කර තිබූ අඩි 6ක් පමණ වූ ගංජා ගස් දෙලක්ෂ පනස්දාහක් පමණ සහිත ගංජා හේන් 4ක් සමඟ කවුඩුල්ල, මැදිරිගිරිය, ඇඹිලිපිටිය, වැල්ලවාය හා පනාමුර ප්‍රදේශවල පදිංචි පුද්ගලයන් පස් දෙනෙකු අත්අඩංගුවට ගෙන වැඩිදුර විමර්ශන කටයුතු සඳහා සැකකරුවන් කතරගම පොලිස් ස්ථානය වෙත භාර දී ඇත.
පසුව ගංජා ගස් සියල්ල එම ස්ථානයේදීම ගිනි තබා විනාශ කර ඇති බව පොලිස් විශේෂ කාර්ය බළකාය පවසයි.
පොලිස් විශේෂ කාර්ය බළකාය බුත්තල කඳවුරේ නිලධාරීන්ට ලද තොරතුරකට අනුව විශේෂ කාර්ය බළකාය අණදෙන නිලධාරී ජ්‍යෙෂ්ඨ නියෝජ්‍ය පොලිස්පති නීතිඥ වරුණ ජයසුන්දර මහතාගේ නියෝග හා උපදෙස් පරිදි මොනරාගල කලාපය භාර පොලිස් අධිකාරී ගුණසිරි මහතාගේ මෙහෙයවීම මත, සහකාර පොලිස් අධිකාරී සම්පත් මහතාගේ අධීක්ෂණයෙන් බුත්තල කඳවුරේ අණදෙන නිලධාරී පොලිස් පරීක්ෂක ටී.එම්.සී.ජනිත් කුමාර ඇතුළු නිලධාරීන් කණ්ඩායමක් විසින් මේ වැටලීම සිදුකර තිබේ.
