නවීකරණය කළ ශ්‍රී ලංකා පොලිස් වෙබ් අඩවිය මහජන ආරක්ෂක හා පාර්ලිමේන්තු කටයුතු ඇමැති ආනන්ද විජේපාල මහතාගේ ප්‍රධානත්වයෙන් පෙරේදා (27) එළිදක්වනු ලැබීය.
වසර දෙකකට පෙර දේශපාලන මැදිහත්වීමක් මත ශ්‍රී ලංකා පොලිස් වෙබ් අඩවිය වෙනස් කළ අතර, ඒ සම්බන්ධයෙන් සමාජයේ මෙන්ම පොලිස් දෙපාර්තමේන්තුව අතර ද විවිධ කතාබහ පැවැතිණි.
ඒ ගැන පොලිස් දෙපාර්තමේන්තුව විශේෂ අවධානයක් යොමු කරමින් නැවතත් ශ්‍රී ලංකා පොලිස් වෙබ් අඩවිය පොලීසියේ සේවාවන් ඇතුළත් කරමින් යාවත්කාලීන කරමින් නවීකරණය කර තිබේ.
ශ්‍රී ලංකා පොලීසියේ නව වෙබ් අඩවිය www.police.lk වෙත පිවිසීමෙන් මහජනතාවට ද එය පරිශීලනය කළ හැකි වන බව පොලිස් මූලස්ථානය සඳහන් කරයි.
පොලිස් මාධ්‍ය කොට්ඨාසය විසින් සකසන ශ්‍රී ලංකා පොලීසියේ තොරතුරු, විශේෂ අවස්ථා, පුවත්, ඡායාරූප, වීඩියෝ ඇතුළු විශේෂාංග රැසක අන්තර්ගතයක් සමඟ නිරන්තරයෙන් යාවත්කාලීන කිරීමට නියමිත මේ නව වෙබ් පිටුව පොලිස් තොරතුරු තාක්ෂණ කොට්ඨාසයේ නිර්මාණයක් බව ද පොලිස් මූලස්ථානය සඳහන් කරයි.
සුපුරුදු පරිදි පොලිස් නිෂ්කාශණ වාර්තා සඳහා අයදුම් කිරීම, මාර්ගගත ක්‍රම ඔස්සේ පැමිණිලි ඉදිරිපත් කිරීමට මේ නව වෙබ් පිටුව හරහා ද අවස්ථාව දී ඇති අතර, ඉදිරියේදී මහජන පහසුවට පොලිස් තොරතුරු තාක්ෂණ කොට්ඨාසය විසින් සකසන ලද තවත් තාක්ෂණික අංග රැසක් මේ නව වෙබ් පිටුවේ ඇතුළත් කිරීමට නියමිත බව ද සඳහන්ය.
මහජන ආරක්ෂක හා පාර්ලිමේන්තු කටයුතු නියෝජ්‍ය ඇමැති, නීතිඥ සුනිල් වටගල, මහජන ආරක්ෂක පාර්ලිමේන්තු කටයුතු අමාත්‍යාංශයේ ලේකම් රවී සෙනෙවිරත්න, වැඩ බලන පොලිස්පති නීතිඥ ප්‍රියන්ත වීරසූරිය, පොලිස් මාධ්‍ය ප්‍රකාශක හා අපරාධ දිසාව නියෝජ්‍ය පොලිස්පති නීතිඥ නිහාල් තල්දූව, පොලිස් තොරතුරු තාක්ෂණ කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරි අශෝක ධර්මසේන, පොලිස් මාධ්‍ය කොට්ඨාසයේ වැඩ බලන අධ්‍යක්ෂ සහකාර පොලිස් අධිකාරි මිනුර සෙනරත් මහත්වරුන් ඇතුළු පිරිසක් මේ අවස්ථාවට සහභාගි වූහ.
