සාමකාමීව විරෝධතා දැක්වීමට පාකිස්තාන ජනතාවට ඇති අයිතියට අමෙරිකාව සහාය දෙන බව එරට රාජ්‍ය දෙපාර්තමේන්තුවේ ප්‍රකාශක මැතිව් මිලර් සඳහන් කළ බව විදෙස් මාධ්‍ය වාර්තා කළේය. රාජ්‍ය දෙපාර්තමේන්තු ප්‍රකාශක මේ අදහස් පළ කර ඇත්තේ හිටපු අගමැති ඉම්රාන් ඛාන් නිදහස් කරන ලෙස ඉල්ලා පසුගියදා පැවැති පා ගමන අතරතුර විරෝධතාකරුවන්ගේ පහරදීමෙන් ආරක්ෂක නිලධාරීන් 6 දෙනකු ජීවිතක්ෂයට පත්වීමෙන් පසුව බව ද විදෙස් මාධ්‍ය වැඩිදුරටත් වාර්තා කළේය.
වොෂින්ටන් නුවර පැවැති මාධ්‍ය හමුවකදී මැතිව් මිලර් සඳහන් කර ඇත්තේ පාකිස්තානයේ සහ ලොව පුරා රටවල ජනතාවගේ අදහස් පළ කිරීමේ නිදහස සහ සාමකාමී රැස්වීම් පැවැත්වීම වෙනුවෙන් අමෙරිකාව පෙනී සිටින බවය. එසේ වුවද ප්‍රචණ්ඩත්වය වළක්වා ගැනීමට දිරිගන්වන බවත්, ඊට සමගාමීව මානව හිමිකම්, මූලික නිදහස සහ නීතිය හා සාමය ආරක්ෂා කරමින් පාකිස්තානයේ නීතියට හා ව්‍යවස්ථාවට අනුකූලව කටයුතු කරන ලෙස රජයෙන් ඉල්ලා සිටින බවත් මැතිව් මිලර් ප්‍රකාශ කර ඇතැයි විදෙස් මාධ්‍ය සඳහන් කළේය.
