25
කළුතර සිට හොරණ දක්වා සවස ධාවනය වූ පෞද්ගලික බස් රථයක් තුළ පිටුපස අසුනක් මත යම් පාර්සලයක් ඇති බව බස් රථයේ ගමන් කරමින් සිටි විශ්වවිද්‍යාල ශිෂ්‍යයෙකු දැක ඇති අතර එම පාර්සලය පරීක්ෂා කර බැලීමේදී එහි මුදල් පසුම්බියක් තිබී ඇත. මුදල් පසුම්බිය තුළ රුපියල් 74,000ක් සහ ලියකියවිලි කිහිපයක් සමඟ හිමිකරුගේ ඡායාරූපයක් සහ ඡායාරූප ආයතනයේ දුරකතන අංක ඇතුළත් රිසිට්පතක් තිබී ඇත.
එම රිසිට්පතේ තිබූ ඡායාරූප ශාලාවේ දුරකතන අංකයට අමතා එම ඡායාරූපයේ සිටි පුද්ගලයාගේ තොරතුරු ලබාගෙන එදිනම (24) සවස එම මුදල විශ්වවිද්‍යාල ශිෂ්‍යයා විසින් කෙසෙල්හේනාව ප්‍රදේශයේ පදිංචි මුදල් පසුම්බියේ හිමිකරු වෙත භාරදී ඇති අතර සම්බන්ධීකරණය කළ ඡායාරූප ශාලා හිමිකරුට ද ස්තූති පුද කරන්නට ඔහු අමතක නොකළේය.
