කොට්ටාව – ගල්කිස්ස (255) බස් මාර්ගයේ මගීන් ප්‍රවාහනය කරමින් තිබූ බස් රථයක ගමන් ගත් මගියෙකුට අමානුෂික ලෙස පහර දුන් බව පැවසෙන බස් රථයේ රියැදුරු හා කොන්දොස්තරවරයාගේ වැඩ තහනම් කොට බස් රථයේ ගමන් වාර තාවකාලිකව අත්හිටවූ බව බස්නාහිර පළාත් මාර්ගස්ථ මගී ප්‍රවාහන අධිකාරියේ කොළඹ අංක 4 ප්‍රාදේශීය කළමනාකරු චානක ලංකානන්ද මහතා පවසයි.
ඊට අමතරව බස්නාහිර පළාත් මාර්ගස්ථ මගී ප්‍රවාහන අධිකාරියේ ප්‍රධාන කාර්යාලය හරහා සිද්ධිය සම්බන්ධයෙන් විමර්ශනයක්ද ආරම්භ කර ඇති බව ප්‍රාදේශීය කළමනාකාරවරයා වැඩිදුරටත් පැවැසීය.
ඉකුත් 24 වැනිදා සවස 6.45ත් රාත්‍රී 08.00ත් අතර කාලය තුළදී මෙම සිදුවීම වී තිබේ. සවස 6.45ට පමණ ගමන් ඇරඹූ මෙම බස් රථය 7.20 පමණ වනවිට පිළියන්දලට ළඟා වී ඇති අතර තවදුරටත් බස් රථයේ පිළියන්දල නගරයේ නවතා තිබීම නිසා ඊට උරණ වූ මගීන් කිහිප දෙනෙකු බස් රථයේ කොන්දොස්තරවරයාගෙන් ඒ පිළිබඳව විමසා තිබේ.
එම අවස්ථාවේදී ඊට අසංවර ලෙස ප්‍රතිචාර දැක්වීම නිසා බස් රථය ඉතා දිගු වේලාවක් නවතා ගෙන සිටීම, ප්‍රවේශපත්‍ර නිකුත් නොකිරීම, ඇතුළු කරුණු කිහිපයක් සම්බන්ධයෙන් මගියා කොන්දොස්තරවරයාගෙන් විමසා තිබේ.
ඉන් පසුව අදාළ බස් රථය ගල්කිස්ස දක්වා ධාවනය කළ යුතු වුවත් කටුබැද්ද හන්දියෙන් බස් රථය නවතා සියලු මගීන් බස්සවා බස් රථයේ කොන්දොස්තරගෙන් ප්‍රශ්න කළේ කවුරුන්දැයි රියැදුරු ඇතුළු පිරිසක් පැමිණ හිසට, ගෙලට අතට පහර දී තුවාල සිදුකර ඇති බව පැවසේ. මෙම සිදුවීම ඒ අවට රැඳී සිටි විශාල පිරිසක් ද දැක තිබේ.
පසුව මේ සම්බන්ධයෙන් බස්නාහිර පළාත් මාර්ගස්ථ මගී ප්‍රවාහන අධිකාරියට හා මොරටුව පොලීසියට පැමිණිලි කර තුවාලකරු කළුබෝවිල ශික්ෂණ රෝහලට ඇතුළත්ව ප්‍රතිකාර ලබමින් සිටියි.
ඒ අනුව සිද්ධියට සම්බන්ධ බව පැවසෙන මොරටුමුල්ල ප්‍රදේශයේ පදිංචි බස් රථයේ රියැදුරු, කොන්දොස්තර හා තවත් පුද්ගලයකු මොරටුව පොලීසිය මඟින් අත්අඩංගුවට ගෙන ඇති අතර මොරටුව අධිකරණයට ඉදිරිපත් කිරීමට නියමිත බව මොරටුව පොලීසියේ උසස් නිලධාරියකු පැවසීය.
සිද්ධිය සම්බන්ධයෙන් වෙනම පරීක්ෂණයක් බස්නාහිර පළාත් මාර්ගස්ථ මගී ප්‍රවාහන අධිකාරියේ ප්‍රධාන කාර්යාලයෙන් මේ වන විට ආරම්භ කර ඇති අතර කොට්ටාව සහ ගල්කිස්ස පර්යන්තවල රාජකාරියේ නිරත වේලා සටහන් නිලධාරීන් ඊයේ (27) ප්‍රධාන කාර්යාලයට කැඳවා ප්‍රකාශ ලබා ගැනීමට නියමිතව තිබූ බව ප්‍රාදේශීය කළමනාකර චානක ලංකානන්ද මහතා පැවසීය.
මීට අමතරව බස් රථයේ ගමන් වාර පරීක්ෂණ අවසන් වන තෙක් තාවකාලිකව අත්හිටුවා ඇති අතර සිද්ධියට සම්බන්ධ බව පැවසෙන රියැදුරු හා කොන්දොස්තරවරයාගේ වැඩ තහනම් කර ඇති බවත් ඔවුන් දෙදෙනාට එරෙහිව ඉදිරි විමර්ශන ක්‍රියාත්මක බව පැවසේ.
සිද්ධිය සම්බන්ධයෙන් බස්නාහිර පළාත් මාර්ගස්ථ මගී ප්‍රවාහන අධිකාරියේ සාමාන්‍යාධිකාරී ජගත් පෙරේරා මහතාගේ අධීක්ෂණය යටතේ ධාවන කළමනාකරු රත්නායක මහතාගේ මෙහෙයවීමෙන් විමර්ශන අංශය පරීක්ෂණ පවත්වති.
