රත්නපුර මහේස්ත්‍රාත් අධිකරණයේ පැවති නඩුවකට පැමිණි පුද්ගලයකු රත්නපුර අධිකරණයේදී හඳුනාගත් පුද්ගලයකු විසින් ලබාදුන් කුඩා තලබෝල ප්‍රමාණයේ දුම්කොළ රෝලක් සිරකුටියට විසි කිරීම සම්බන්ධයෙන් අත්අඩංගුවට ගෙන රත්නපුර මහේස්ත්‍රාත් සමන් පරණගම මහතා හමුවට ඉදිරිපත් කිරීමෙන් පසු සැකකරු ලබන දෙසැම්බර් මස 6 දක්වා රක්‍ෂිත බන්ධනාගාරගත කරන ලෙස නියෝග කරනලදි.
පැල්මඩුල්ල, නාරංගොඩ පදිංචි ටෙනිසන් සරත් කුමාර නමැති 40 හැවිරිදි අයෙකු මෙසේ රක්‍ෂිත බන්ධනාගාරගත කෙරිණි. තලගුළි ප්‍රමාණයේ කුඩා ගුළි පාර්සලයක් සැකකරු අධිකරණයේ සිරකුටිය තුළට විසිකරනු දුටු බන්ධනාගාර
නිලධාරියකු විසින් විසිකරන ලද ගුළිය ලිහා බැලීමේදී එහි දුම්කොළ තිබෙනු දැක ඇත. වහාම තම භාරයට ගෙන මහේස්ත්‍රාත්වරයාට දන්වා සැකකරු රත්නපුර අධිකරණ පොලිස් මුර පොළේ ස්ථාන භාර නිලධාරි උපපොලිස් පරීක්ෂක අනුර බණ්ඩාර මහතාට භාරදී ඇත. සැකකරුගෙන් ප්‍රශ්න කිරීමේදී තමාට අධිකරණයේදී හඳුනාගත් පුද්ගලයකු මෙම කුඩා පාර්සලය ලබා දී සිරකුටියට විසිකරන ලෙස කී බවත් ඒ අනුව තමා විසිකළ බවත් එහි තිබුණේ කුමක්ද යන්න තමා නොදන්නා අතර ලබා දුන් පුද්ගලයා කවුදැයි තමා නොදන්නා බවද පවසා ඇත.
රත්නපුර අධිකරණ සංකීර්ණයේ පොලිස් මුරපොළේ ස්ථාන භාර නිලධාරි අනුර බණ්ඩාරනායක මහතා විසින් සැකකරු රත්නපුර පොලීසියට භාරදෙනු ලැබූ අතර රත්නපුර පොලීසිය විසින් පෙරේදා (26) අධිකරණයේ නඩු පවරන ලදි.
