යුනෙස්කෝ ලෝක උරුමයක් වන ඓතිහාසික ගාලු කොටුවේ සංචාරකයන් සඳහා පිහිටුවා ඇති සංචාරක පොලීසියේ ගැටලු රාශියක් පවතින බව ජනතාව පවසති.
කන්ටේනර් පෙට්ටියක් තුළ පවත්වාගෙන යන ගාලු කොටුව සංචාරක පොලීසිය පිහිටුවා ඇත්තේ ප්‍රසිද්ධ වැසිකිළි පද්ධති දෙකක් අතර ප්‍රදේශයකය. මින් එක් වැසිකිළි පද්ධතියක අසූචි මිශ්‍ර ජලය උතුරා යෑම හේතුවෙන් සේවා ලබා ගැනීමට පැමිණෙන විදේශිකයන් මෙන්ම පොලිස් නිලධාරින් දුෂ්කරතාවන්ට පත්ව ඇත. කන්ටේනර් පෙට්ටියක් තුළ පිහිටුවා ඇති මෙම ඒකකයේ තිබූ වායු සමීකරණ යන්ත්‍රය ද කලක සිට අක්‍රිය වී තිබේ.
දහවල් කාලයේ දැඩි උණුසුම හේතුවෙන් මෙම කන්ටේනරය තුළ රාජකාරි කරන නිලධාරින්ට රැඳී සිටීම අපහසු බවත්, සේවා ලබා ගැනීමට පැමිණෙන්නන් ද දුෂ්කරතාවන්ට පත්වන බව ඔවුහු පෙන්වා දෙති. කෙසේ වෙතත් සංචාරක පොලීසිය සඳහා ස්ථානයක් ගාල්ල කොටුව තුළ වෙන්කර තිබුණත් බලධාරින් එය තවමත් ලබා නොදෙන්නේ මන්දැයි ජනතාව ප්‍රශ්න කරති. ඔවුන් වැඩිදුරටත් කියා සිටින්නේ, මේ සම්බන්ධයෙන් අවධානය යොමු කර, සංචාරක පොලීසිය විධිමත් ස්ථානයක පිහිටුවා ගාල්ල කොටුවට පැමිණෙන විදෙස් සංචාරකයන්ගේ ආරක්ෂාව තහවුරු කරන ලෙසයි.
