බළන්ගොඩ, වෙලේකුඹුර ප්‍රදේශයේ නිවෙසක මිදුලේ ඇති ජල කරාමය වෙත යමින් සිටි කාන්තාවක, නිවෙසේ බිත්තිය අසල ඇති කානුවකට වැටී පෙරේදා (26) රාත්‍රියේ මිය ගොස් ඇතැයි බළන්ගොඩ පොලීසිය පවසයි. මෙලෙස මිය ගොස් ඇත්තේ මානපන්විල, රක්වාන ලිපිනයේ පදිංචිව සිටි ආර්. ප්‍රේමාවතී නමැති 64 හැවිරිදි කාන්තාවකි.
මෙම නිවෙසේ සිටින මහලු කාන්තාවක රැකබලා ගැනීම සඳහා මරණකාරිය මීට මාස කිහිපයකට පෙර මෙම නිවෙසට පැමිණ ඇති බවට තොරතුරු අනාවරණය වී තිබේ. හදිසි මරණ පරීක්ෂණය ශාන්ත ජයසේකර මහතා විසින් සිදු කරනු ලැබූ අතර, සිරුර පශ්චාත් මරණ පරීක්ෂණය සඳහා බළන්ගොඩ මූලික රෝහලට රැගෙන යන ලෙස ඒ මහතා පොලීසිය වෙත දැනුම්දීමක් කර සිටියේය. සිද්ධිය සම්බන්ධයෙන් බළන්ගොඩ පොලීසියේ ස්ථානාධිපති, ප්‍රධාන පොලිස් පරීක්ෂක දමිත් ජයකොඩි මහාතාගේ උපදෙස් පරිදි වැඩිදුර පරීක්ෂණ සිදු කරයි.
