ඇසුරුමේ සඳහන් කල් ඉකුත් වූ දිනය හා නිෂ්පාදන දිනය වෙනස් කරමින් වෙළෙඳපොළට නිකුත් කිරීමට සූදානම් කළ ඉන්දියාවෙන් ආනයනය කළ කුරක්කන් ටොන් 22ක් සහ කූනිස්සන් කිලෝග්‍රෑම් 975ක් පාරිභෝගික කටයුතු පිළිබඳ අධිකාරියේ නිලධාරීන් විසින් පෙරේදා (26) කොළඹ, කොටහේන ප්‍රදේශයේ ගබඩා පරීක්ෂා කර සිය භාරයට ගෙන තිබේ.
කුරක්කන් කිලෝග්‍රෑම් 30 බැගින් වූ ඇසුරුම් 740ක, නිෂ්පාදිත වර්ෂය 2024 ලෙස හා එය මාස 12ක් ඇතුළත භාවිත කළ යුතු බවට ඉන්දීය නිෂ්පාදකයා විසින් සඳහන් කොට තිබුණ ද ශ්‍රී ලාංකික ආනයනකරු විසින් ඇසුරුම් කළ වර්ෂය හා මාසය, 2024 අගෝස්තු සහ කල් ඉකුත් වන වර්ෂය, මාස 24ක් ඉදිරියට යොදමින්, 2026 ජූලි ලෙස ස්ටිකරයක් මඟින් වෙනස් කර වෙළෙඳපොළට නිකුත් කිරීමට කටයුතු යොදා තිබිණි.
කූනිස්සන් කිලෝග්‍රෑම් 5 බැගින් වූ ඇසුරුම් 195ක නිෂ්පාදිත වර්ෂය හා මාසය 2024 ජූලි ලෙස හා කල් ඉකුත් වන වර්ෂය හා මාසය 2024 දෙසැම්බර් ලෙස සඳහන් කර තිබුණ ද ඒ මත, නිෂ්පාදිත වර්ෂය හා මාසය 2024 ඔක්තෝබර් සහ කල් ඉකුත්වීමේ දිනය 2025 සැප්තැම්බර් ලෙස ස්ටිකරයක් මඟින් වෙනස් කර වෙළෙඳපොළට නිකුත් කිරීමට කටයුතු යොදා තිබිණි.
මෙම කරුණු අධිකරණයට වාර්තා කර අදාළ ව්‍යාපාරිකයාට විරුද්ධව නීතිමය කටයුතු සිදු කිරීමට කටයුතු යොදා ඇත. ඉදිරි උත්සව සමය තුළ මෙවැනි භාණ්ඩ වෙළෙඳපොළට නිකුත් කිරීම වැළැක්වීමට දිවයින පුරා විමර්ශන සහ වැටලීම් සිදු කරන ලෙස පාරිභෝගික කටයුතු පිළිබඳ අධිකාරියේ සභාපති හේමන්ත සමරකෝන් මහතා නිලධාරීන්ට උපදෙස් දී ඇත.
එළඹෙන උත්සව සමය තුළ තොරතුරු වෙනස් කරන ලද ආහාර ඇතුළු භාණ්ඩ වෙළෙඳපොළට නිකුත් කිරීම වැළැක්වීම සඳහා මෙම විශේෂ වැටලීම් ක්‍රියාත්මක වන අතර එහිදී තොග ගබඩා සම්බන්ධව වැඩි අවධානයක් යොමු කරනු ලබන බව පාරිභෝගික කටයුතු පිළිබඳ අධිකාරිය පවසයි.
