2022 මැයි 9 දා ගාලුමුවදොර පිටියේදී අරගලකරුවන්ට පහර දීමේ සිද්ධියට අදාළව නඩුව විවෘත අධිකරණයේ කැඳවූ අවස්ථාවේ අධිකරණයේ පෙනී නොසිටි ඩෑන් ප්‍රියසාද් ඇතුළු තිදෙනකු අත්අඩංගුවට ගෙන අධිකරණයට ඉදිරිපත් කරන ලෙස කොටුව මහේස්ත්‍රාත් තනූජා ලක්මාලි මහත්මිය ඊයේ 27 නියෝග කළාය. සැකකරු මේ වන විට විදේශගතව ඇති බව නීතිඥ සුදර්ශනී ගුණරත්න මහත්මිය ඔහු වෙනුවෙන් පෙනී සිටිමින් අධිකරණය හමුවේ දන්වා සිටියද ඔහු ඇතුළු අධිකරණයේ පෙනී නොසිටි සැකකරුවන් තිදෙනකුට මහේස්ත්‍රාත්වරිය වරෙන්තු නිකුත් කළාය.
නඩුව කැඳවූ අවස්ථාවේ අධිකරණයේ පෙනී නොසිටි මහින්දරත්න කහඳගම යන අය වෙනුවෙන් ඇපකරු පෙනී සිටිමින් ඔහු විදේශගත වී ඇති බව අධිකරණයට දන්වා සිටියේය. රජයේ දේපළවලට හානි කිරීම සම්බන්ධයෙන් සැකකරුවන්ට එරෙහිව පොදු දේපළ පනත යටතේ චෝදනා ගොනු කර ඇති බව අපරාධ පරීක්ෂණ දෙපාර්තමේන්තුව අධිකරණයට දන්වා සිටියේය. අරගලකරුවන්ට පහර දීමේ සිද්ධිය සම්බන්ධයෙන් පාර්ලිමේන්තු මන්ත්‍රීවරුන් වන මිලාන් ජයතිලක, ජොන්ස්ටන් ප්‍රනාන්දු ඇතුළු සැකකරුවන් 36 දෙදෙනාගෙන් සැකකරුවෝ 34 දෙනෙක් විවෘත අධිකරණයේ පෙනී සිටියහ.
හිටපු ඇමැති ජොන්ස්ටන් ප්‍රනාන්දු මහතා වෙනුවෙන් ජනාධිපති නීතිඥ සම්පත් මෙන්ඩිස් මහතා පෙනී සිටි අතර, සෙසු සැකකරුවන් වෙනුවෙන් නීතිඥ තිළිණ වීරසිංහ මහතා ඇතුළු නීතිඥ මඬුල්ලක් අධිකරණය හමුවේ පෙනී සිටියේය. සිද්ධිය සම්බන්ධයෙන් නඩුව ලබන වසර මාර්තු 26 දා යළි කැඳවන ලෙස මහේස්ත්‍රාත්වරිය නියෝග කළාය.
