සුදු පාට ඔසරිය

මම නම් කියන්නෙ සුදුපාට ඔසරිය ලස්සන වෙයි ඔයාට. ඒකේ ලස්සන රත්තරන් පාට වගේ බෝඩරේකුත් තියනවනේ. තැල්ලක් දාලා , එල්ලෙන කරාඹු එතකොට කොණ්ඩෙත් ඕනි නම් බෝලයක් වගේ දාලා ලස්සන මල් ගහලා… එහෙම ලස්සන වෙයි.

ඔහේ බලන් ඉන්න එපා, අපි මේ තෝරන්නේ ඔයාගේ ලස්සනම දවසෙ ඔයා ඇඳන් ඉන්න එක. මනමාලියක් වෙනව කියන්නෙ කෙල්ලෙක්ගේ හීනයක්. ඒ දවසේ ඔයා මෙහෙම ඉන්න ඕනි.

හරි හිමීට බලමු. දැනට මෙහෙම මට ඔයා ළඟට වෙලා ඉන්න දෙන්නකෝ…

හ්ම්ම්ම්ම්

අපිට ගොඩක් දේවල් තෝරන්න තියනවා. මල් , එතකොට Bridesmaids ල ගෙ ඒවා හැමදේම. outdoor පෝරුව කරන නිසා ඒකෙත් පාට ගැන අනික් දේවල් ගැන හැමදේම ගැන. වෙඩින් කාඩ් ගහලත් ඉවරයි තාම අනික් ටික ලෑස්ති කරලා ඉවර නෑ. මම මෙහෙම කිය කිය එකින් එක තෝරද්දී එයා කළේ මගෙ අතින් අල්ලන් ඔහේ අහස දිහා බලන් හිටපු එක විතරයි.

ඔයත් තෝරන්නකෝ…

ඔයාට වගේ හොදඳ තේරීමක්වත් තේරුම් ගැනීමක්වත් මට නෑ ඒක නිසා ඔයා තෝරන්න. ඔයා තෝරන ඒවගේ ආයේ වරදක් තියෙන්න බෑ.

එයා කිව්වේ එහෙම විතරයි.

හ්ම්ම්ම් මම ඔක්කොම තෝරල දුන්නනේ. දැන්වත් ඉතින් මේ හැමදේම ලස්සන ද කියලවත් කියන්නකෝ.

ඔව් හැමදේම හරි ලස්සනයි. සුදු ඔසරිය, ලස්සන රෝසමල් ඩෙකෝ , පෝරුව හැමදේම හරි ලස්සනයි… හැමදාම ඔයා තෝරනවා වගේ හරිම චාම් හරිම ලස්සනයි. එයා එහෙම කිව්වට මූණේ තිබුණේ මැලවෙච්ච හිනාවක් විතරයි.

හරි, දැන් ඉතින් බඳින්න විතරයි තියෙන්නේ. මම මෙහෙමම යන්නම් ඔයා ඔය චුට්ට පරිස්සමෙන් යන්න.

මෙහෙමම මාසයක් ගියේ අපි දන්නෙවත් නැතුව…

චූටි මල්ලි මොකෝ මේ සෙනසුරාදා වෙලත් තමුසේ උදේ පාන්දර නැඟිටගෙන දත් මදින්නෙ කොහේ යන්නද.. අපේ අක්කගේ ගෝරනාඩුව උදේම..

මම පොඩි වැඩකට යනවා යාළුවෙක්ගේ, දවල් වෙද්දී එනවා.. පරක්කු වෙන්නෙ නෑ..

ඇයි නැකතට තියන වැඩක්ද කියල අක්ක ඇහුවම මට ඇත්තටම හිනාගියා.

නැකතට වගේ ගිහින් උදේ 9.00 වෙද්දී කිව්වත් වගේ 12 වෙද්දී මම ආපහු ගෙදර.

මම තේ එකක් බීලා කාමරේට වැදුණා.

දැන් ඉතින් උදේ ඒවත් එක්ක අල්ලලා නිදියයි කියලා අක්ක අම්ම එක්ක කියනවා ඇහුණා මට.

මල්ලී මල්ලී දොර අරිනවකෝ… අක්කගේ සද්ද පූජාවට මම නැඟිටිද්දී වෙලාව හතරටත් ළඟයි.

මේ බලනවකෝ ගාගෙන අක්ක facebook post එකක් පෙන්නනවා.

තමුසෙගේ පණ වගේ හිටපු එකී නේ මේ බැඳලා තියෙන්නෙ. බලනවා හිනාවෙවී ඉන්න ලස්සන. හැබැයි මොනා උනත් ඔසරියට මාර හැඩයි. බලනවා අර තැල්ල ඔළුවෙ තියන මල්වල ලස්සන. ඒ පාටවල් ,මල් , පෝරුව ඔක්කොම මාරම ලස්සනයි හොඳේ මොනා උනත්. බලනවා ඉතින් ඒකි  ඔක්කෝම දේවල් පිළිවෙළක් කරන් කසාඳ බැඳලා ලස්සනට හිනාවෙලා ඉන්නවා . ඒ උනාට තමුසේ….

ඉතින් ඒක තමයි අක්කෙ වෙන්න ඕනි. එයා ලස්සනට හිනාවෙලා ඉන්න ඕනි. මාත් මෙහෙම ඉඳී..

මම ඒ රූපේ දිහා තව පාරක් බැලුවා.. මම තෝරපු හැමදේම හරිම ලස්සනට තිබුණා.. උදේම ලෑස්ති වෙලා නැකතට ගිහින් හොරෙන්ම එයාව බලල ආව තරම් ලස්සනටම එයා පින්තුරවලත් හිටියා.

එයා හැමදාමත් එහෙම ලස්සනට ඉන්න ඕනි එච්චරයි !

කොවිඳු ප්‍රභාෂ්වර