සිරුරු කොටස් ගන්නෝරුව පශු වෛද්‍ය පර්යේෂණායතනයට
දැනට සති දෙක තුනක පමණ කාළයක සිට සූකර උණ බවට සැකකරන මාරාන්තික වයිරස් උණකින් රත්නපුර දිස්ත්‍රික්කයේ කුරුවිට, ඇහැළියගොඩ, රත්නපුර, කරපිංච, බළන්ගොඩ, ඇඹිලිපිටිය වැනි ප්‍රදේශවල වල් ඌරන් හා ගම් ඌරන් තැන තැන මිය යමින් පවතින අතර, මෙම තත්ත්වය මත මේ දිනවල ඌරු මස් කෑමට ප්‍රිය කරන අය පවා ඌරු මස් අනුභවය අත්හැර ඇති බවට වාර්තා වේ.
පසුගියදා රත්නපුර ගලුකාගම ප්‍රදේශයේ තේ පර්යේෂණායතනයට අයත් ඉඩමකට කෑම සොයා රාත්‍රී කාලයේ පැමිණි වල් ඌරන් තිදෙනකු අබිරහස් ලෙස මියගොස් සිටි අතර, මියගිය එම වල් ඌරන් මියගොස් ඇත්තේ කුමන රෝගී තත්ත්වයක් වැලඳීමෙන්ද යන්න තහවුරු කර ගැනීමට රත්නපුර තේ පර්යේෂණායතනයේ ප්‍රධානී ආචාර්ය ශ්‍යාමන්ත බණ්ඩාර මහතා විසින් රත්නපුර පශු වෛද්‍ය කාර්යාලයේ පශු වෛද්‍ය නාලක මුණසිංහ මහතාට දැන්වීමෙන් අනතුරුව එම වෛද්‍යවරයා ඇතුළු කණ්ඩායමක් පැමිණ ඔවුන්ගේ සිරුරු කපා ශරීර කොටස් වැඩිදුර පරීක්ෂණ සඳහා ගන්නෝරුව පශු වෛද්‍ය පර්යේෂණායතනයට යැවීමට කටයුතු කෙරිණි.
මෙසේ මියගොස් සිටි ඌරන්ගේ ඇස්වලින් ලේ වහනය වී තිබූ අතර, පශු වෛද්‍ය නාලක මුණසිංහ මහතා පවසා සිටියේ මෙම ඌරන් මිය යාමට හේතුව ලෙස සැක කරන්නේ මිය යන ඌරන් සූකර උණට ගොදුරුවී ඇති බවයි. මෙම වයිරසයට ඖෂධ නොමැති බැවින් ශරීර ප්‍රතිශක්තියෙන් සුව වන සතුන් ඉතාම අල්ප බවත්, මිය යන ප්‍රතිශතය 90%ක් පමණ වන බවත් වෛද්‍යවරයා පැවැසීය.
මේ වන විට රත්නපුර දිස්ත්‍රික්කයේ ප්‍රදේශ ගණනාවකින් මෙම සතුන් මිය යන බවට වාර්තා වී ඇති බවද, ඇඹිලිපිටිය ප්‍රදේශයේ ඌරු කොටුවක සිටි ඌරන් 133 දෙනෙකුගෙන් මේ වන විට ඉතිරිව සිටින්නේ විස්සක පමණ කණ්ඩායමක් පමණක් බවද ඉතිරි ඌරන් මෙම වයිරස් උණ රෝගයට ගොදුරුවීමෙන් මියගොස් ඇති බවද, මැරුණු සතුන්ගෙන් ලබා ගත් සිරුරු කොටස් මේ වනවිට ගන්නෝරුව පශු වෛද්‍ය පර්යේෂණායතනයට යවා ඇති බැවින් එම වාර්තා ලැබුණු පසු මෙම රෝගී තත්ත්වය පිළිබඳව පැහැදිලි අදහසක් පළ කළ හැකි බවද වෛද්‍යවරයා පැවැසීය. මෙසේ මැරෙන සතුන්ගේ මස් අනුභවයෙන් ජනතාවට එම රෝගය බෝ නොවන බවත්, එම වයිරසය බෝවන්නේ ඌරන්ට පමණක් බවත් ඔහු වැඩිදුරටත් පැවැසීය.
