මත්ද්‍රව්‍ය ජාවාරම්කරුවන්ට එරෙහිව මෙහෙයුම් වැඩි කර ඇති බවත් එම මෙහෙයුම්වල ඉලක්කය බවට පත්ව ඇත්තේ මත්ද්‍රව්‍ය සැපයුම් ජාලය හඳුනාගෙන එම සැපයුම් ජාලය බිඳ දැමීම බවත් වැඩබලන පොලිස්පති නීතිඥ ප්‍රියන්ත වීරසූරිය මහතා සඳහන් කරයි. මත්ද්‍රව්‍ය සැපයුම් ජාලය බිඳ දැමීම සඳහා කෙරෙන මෙහෙයුමක ප්‍රතිඵලයක් මෑතකදී දකින්නට ලැබුණු බවත් මෑත ඉතිහාසයේ ගොඩබිම් මෙහෙයුමකදී වැඩිම මත්ද්‍රව්‍ය ප්‍රමාණයක් එහිදී අත්අඩංගුවට ගැනීමට හැකිවූ බවත් වැඩබලන පොලිස්පතිවරයා පැවසුවේය. මෑතකදී මාලදිවයිනෙන් ද දකින්නට ලැබුණේ එවැන්නක් බව ද ඔහු කීය.
මත්ද්‍රව්‍ය භාවිත කරන්නන් අත්අඩංගුවට ගැනීම තුළින් මත්ද්‍රව්‍ය නතර කිරීමට නොහැකි බව තරයේ විශ්වාස කරන බවත් කළ යුතු වන්නේ සැපයුම නතර කිරීම බවත් වැඩ බලන පොලිස්පතිවරයා අවධාරණය කළේය.
“එම සැපයුම නතර කිරීමට අවශ්‍ය කටයුතු තමයි දැන් අපි කරගෙන යන්නේ” යැයිද වැඩ බලන පොලිස්පතිවරයා කීය. මත්කුඩු ජාලය ගැන මෙන්ම ප්‍රාදේශීය වශයෙන් බෙදා හරින ජාලය සම්බන්ධයෙන් දන්නා තොරතුරු 1997 කෙටි දුරකතන අංකය ඔස්සේ ලබාදීමට මහජනතාවට හැකියාවක් ඇති බව ද වැඩ බලන පොලිස්පතිවරයා වැඩිදුරටත් සඳහන් කළේය.
