සම්බාහනයක් කර ගැනීමට බම්බලපිටියේ පිහිටි ස්ථානයකට පැමිණි වෛද්‍යවරයෙකු බියගන්වා ඔන්ලයින් ක්‍රමයට රුපියල් දස ලක්ෂ පහළොස් දහසක් කොල්ලකෑ බව කියන සිද්ධිය සම්බන්ධයෙන් රක්ෂිත බන්ධනාගාර ගතව සිටින සැකකරුවන් සිවුදෙනා අද (26) රජයේ රස පරීක්ෂකවරයා වෙත ඉදිරිපත් කර ඔවුන් සම්බන්ධයෙන් වාර්තාවක් කැඳවන ලෙස කොළඹ අතිරේක මහේස්ත්‍රාත් පසාන් අමරසිංහ මහතා බම්බලපිටිය පොලීසියට ඊයේ (25) නියෝග කළේය. අදාළ සැකකරුවන් අද දිනය තුළ රජයේ රස පරීක්ෂක වෙත යොමු කිරීමට අවශ්‍ය පියවර ගන්නා ලෙස බන්ධනාගාර අධිකාරිවරයාට අධිකරණය විසින් නියම කෙරිණි.
මෙම සිද්ධියට අදාළ මෙම සැකකරුවන්ගේ අදාළ නඩු භාණ්ඩ මේ වන විට රස පරීක්ෂක වෙත යවා ඇති අතර, ඩී.එන්.ඒ. පරීක්‍ෂණයක් සඳහා අදාළ සැකකරුවන් තිදෙනා ද රජයේ රස පරීක්ෂක වෙත යොමු කර නියෝගයක් ලබා දෙන ලෙසට බම්බලපිටිය පොලීසිය කරන ලද ඉල්ලීමක් සලකා බැලීමෙන් අධිකරණය එසේ නියම කළේය.
කොළඹ දිස්ත්‍රික්කයේ පදිංචි සුදාරක දේවප්‍රිය, මොහොමඩ් සාදිප් උෂුප්, රාජපක්ෂගේ අශේන්, දිමුතු එරංග යන සැකකරුවන් සිවුදෙනා ලබන 27 දක්වා තවදුරටත් රක්ෂිත බන්ධනාගාරගත කරන ලෙසට ද මහේස්ත්‍රාත්වරයා නියෝග කළේය. මෙම සිද්ධියට අදාළව ආධාර අනුබල ලබා දුන්නැයි ජන අරගල සංවිධානයේ කොළඹ දිස්ත්‍රික් අපේක්ෂිකාවක වන ඇතුළත් මුදලිගේ මාලා ප්‍රනාන්දු ප්‍රියන්ති සහ ඇයගේ සැමියා වන ඇතුලත් මුදලිගේ චමින්ද පුෂ්පකුමාර යන අය පෙර නඩු දිනයකදී ඇප මත නිදහස් කරනු ලැබීය.
