කොළොන්නාව ලක්සඳ සෙවණ මහල් නිවාස සංකීර්ණයේ පස්වන මහලේ පෙරේදා (21) රාත්‍රී ඇති වූ හදිසි ගින්නකින් එම ගොඩනැඟිල්ලේ එක් පැත්තක අභ්‍යන්තර විදුලි රැහැන් පද්ධතිය (Duct line) සම්පූර්ණයෙන්ම විනාශ වී ඇතැයි කොළඹ ගිනි නිවීම් සේවා දෙපාර්තමේන්තුව පවසයි. මේ ගින්නෙන් පිට වූ විෂ දුමාරය ආඝ්‍රාණය වී පුද්ගලයන් සිවු දෙනකු ප්‍රතිකාර සඳහා කොළඹ ජාතික රෝහලට ඇතුළත් කළ බව ද ගිනි නිවීම් සේවා දෙපාර්තමේන්තුව කියයි.
මේ ගින්න පෙරේදා (21) රාත්‍රී 11.20ට පමණ හටගෙන ඇති අතර ඒ බව කොළඹ ගිනි නිවීම් සේවා දෙපාර්තමේන්තුවට කළ දැනුම්දීමකට අනුව එහි කාර්ය භාර නිලධාරී බී.ඩී.ඇම්. කරුණාතිලක මහතා ඇතුළු නිලධාරීන් කණ්ඩායමක් ගිනි නිවීම් රථ දෙකක් සමඟ එම ස්ථානයට ගොස් තිබුණි.
ඒ යන විටත් ගොඩනැඟිල්ලේ පස්වන මහලේ ගින්නක් හටගෙන තිබූ අතර එය පාලනය කිරීමට කෝට්ටේ මහ නගර සභාවේ තවත් ගිනි නිවන රථ දෙකක් ගෙන්වා තිබූ බව ද වාර්තා වෙයි.
මේ ගොඩනැඟිල්ලට විදුලිය සැපයෙන ගොඩනැඟිල්ලේ එක් පැත්තක පිහිටි අභ්‍යන්තර විදුලි රැහැන් පද්ධතිය ගමන් ගන්නා (Duct line) මාර්ගයේ මේ ගින්න හටගෙන තිබූ අතර විදුලි කාන්දුවක් මේ ගින්නට හේතු වී ඇතැයි පැවසේ. මෙහි අටවන මහලේ තිදෙනකු සිර වී සිටින බවට ලද තොරතුරකට අනුව ගිනි නිවන භටයන් මහත් පරිශ්‍රමයක් දරා ඔවුන් තිදෙනා ද බේරාගෙන තිබේ. මීට දින දෙකකට පෙරත් මේ මහල් සංකීර්ණයේ ගින්නක් හටගෙන ඇති අතර එහි පදිංචිකරුවන් විසින් එම ගින්න නිවා දමා තිබේ.
මේ ගොඩනැඟිල්ලේ ගිනි නිවීමේ පද්ධතිය සම්පූර්ණයෙන්ම අක්‍රියව පැවතීම සහ ඒවායේ උපකරණ සොරුන් ගලවාගෙන යෑම ගින්න පාලනය කිරීමට බාධා එල්ල වී තිබුණි.
සිද්ධිය සම්බන්ධයෙන් වැල්ලම්පිටිය පොලීසිය පරීක්ෂණ පවත්වයි.
