වයස අවුරුදු පහක් වයසැති පිරිමි දරුවකු 2025 වර්ෂයේදී පළමු ශ්‍රේණියට ඇතුළත් කර ගැනීම සඳහා රුපියල් එක්ලක්ෂ පනස්දාහක (150,000) අල්ලස් මුදලක් ඉල්ලා සිටි බව කියන සිද්ධිය සම්බන්ධයෙන් රක්ෂිත බන්ධනාගාරගත කර සිටි රජයේ පාසලක විදුහල්පතිනියක් ලබන 6 දක්වා තවදුරටත් රක්ෂිත බන්ධනාගාරගත කරන ලෙසට කොළඹ ප්‍රධාන මහේස්ත්‍රාත් තිළිණ ගමගේ මහතා ඊයේ (22) නියෝග කළේය.
මෙම සිද්ධියට අදාළව සාක්ෂිකරුවන් වන පාසලේ මුරකරු සහ පාසල් සංවර්ධන සමිතියේ නිලධාරින් අල්ලස් සහ දූෂණ විමර්ශන කොමිසමට පැමිණ සිද්ධියට අදාළව ප්‍රකාශ ලබා දෙන තෙක් තවදුරටත් රක්ෂිත බන්ධනාගාරගත කරන ලෙසට අල්ලස් කොමිසම කරන ලද ඉල්ලීමක් සලකා බැලීමෙන් පසුව මහේස්ත්‍රාත්වරයා විසින් මෙලෙස නියෝග කෙරිණි. වත්තල ප්‍රදේශයේ පදිංචි ප්‍රසිද්ධ ප්‍රාථමික පාසලක විදුහල්පතිනිය ලෙස රාජකාරි කරනු ලැබූ සැකකාරිය මෙලෙස රක්ෂිත බන්ධනාගාරගත කෙරුණි.
රාගම ලිපිනයේ පදිංචි මොහොමඩ් ෆාතිමා යන මුස්ලිම් කාන්තාව විසින් ඉකුත් 6 වන අල්ලස් හා දූෂණ විමර්ශන කොමිසමට කරන ලද පැමිණිල්ලක් සලකා බැලීමෙන් අනතුරුව මහේස්ත්‍රාත්වරයා විසින් මෙම නියෝගය ලබාදෙනු ලැබීය. පැමිණිලිකාරිය රාගම ලිපිනයේ පදිංචිව සිටින අතර ඇයගේ වයස අවුරුදු පහක් වන වැඩිමහල් පිරිමි දරුවා 2025 වර්ෂය සඳහා පළමු ශ්‍රේණියට ඇතුළත් කර ගැනීමට ආසන්නතාවය පදනම මත මෙම ප්‍රාථමික විද්‍යාලයට අයදුම්පත් ඉදිරිපත් කර තිබූ බව අල්ලස් කොමිසම අධිකරණයට දැනුම් දුන්නේය.
එම අයදුම්පතට අනුව දරුවා පාසලට ඇතුළත් කර ගැනීම සඳහා සම්මුඛ පරීක්ෂණයක් පැවැත්වීමට ඉකුත් අගෝස්තු 30 වන දින පාසලට පැමිණෙන ලෙස ලියුමක් ලැබී තිබුණු බව පැමිණිලිකාරිය සඳහන් කළ බව අල්ලස් කොමිසම අධිකරණයට දැනුම් දුන්නේය. එම සම්මුඛ පරීක්ෂණයෙන් පසුව මෙම පාසලට පළමුවන ශ්‍රේණියට තෝරාගන්නා ලද දරුවන්ගේ නාම ලේඛනයක් දැන්වීම් පුවරුවේ පළ කර ඇති බව දැනගත් පැමිණිලිකාරිය ඒ පිළිබඳ සොයා බැලීමට පාසලට ගිය අවස්ථාවේ තම දරුවාගේ නම එහි සඳහන් නොතිබීම නිසා විදුහල්පතිනියගෙන් ඊට හේතු විමසා සිටි අවස්ථාවේ සම්මුඛ පරීක්ෂණයෙන් ලකුණු අඩුවී තිබීම නිසා දරුවා පාසලට ඇතුළත් කර ගැනීමට නොහැකි බව පැමිණිලිකාරියට දැනුම් දුන් බව අල්ලස් කොමිසම අධිකරණයට දැන්වීය.
පැමිණිලිකාරිය විසින් නැවතත් ඉකුත් සැප්තැම්බර් මස 26 දින එම පාසලට ගොස් සිංහල මාධ්‍යයෙන් තම දරුවාට ඉගෙන ගැනීමට අවශ්‍ය බව පවසා ඒ සඳහා අවස්ථාවක් ලබා දෙන ලෙස විදුහල්පතිනියගෙන් අයැද සිටී බව අල්ලස් කොමිසම දැනුම් දුන්නේය. එම අවස්ථාවේ විදුහල්පතිනිය විසින් සම්මුඛ පරීක්ෂණය සඳහා දරුවා ලකුණු 36ක ප්‍රමාණයක් පමණක් ලබා තිබීම නිසා පාසලට ඇතුළත් කර ගැනීමට අවශ්‍ය නම් තමාහට රුපියල් 150,000ක මුදලක් ලබා දෙන ලෙස පැමිණිලිකාරියට ප්‍රකාශ කළ බව අල්ලස් කොමිසම අධිකරණයට දැනුම් දුන්නේය. පැමිණිලිකාරියගේ ස්වාමිපුරුෂයා කුලී වැඩ කරන තැනැත්තකු නිසා මෙම මුදල ගෙවීමට හැකියාවක් නොමැති නමුත් තම දරුවා වෙනුවෙන් එම මුදල ගෙවීමට පැමිණිලිකාරිය එකඟතාවය පළ කළ බව අල්ලස් කොමිසම අධිකරණයට දැනුම් දුන්නේය.
සැකකාර විදුහල්පතිනිය විසින් පසුගිය නොවැම්බර් මස 7 වන දින පස්වරු තුනට තනිවම විදුහල්පති කාර්යාලය වෙත පැමිණ මුදල් ප්‍රමාණය ලබා දෙන ලෙස පැමිණිලිකාරියට පැවසූ බව අල්ලස් කොමිසම අධිකරණයට දැනුම් දුන්නේය. මෙම සිද්ධිය සම්බන්ධයෙන් පැමිණිලිකාරිය තම හිතවතුන් සමඟ පැවසූ අවස්ථාවේදී එම පුද්ගලයන් විසින් 1954 කොමිෂන් සභාවට කතාකර අල්ලස් ලබා ගන්නා බවට පැමිණිල්ලක් කරන ලෙස අවවාද ලබා දුන් බව අල්ලස් කොමිසම දැන්වීය. ඒ අනුව අල්ලස් හා දූෂණ විමර්ශන කොමිසම විසින් පැමිණිලිකාරියගේ සහෝදරයකු බවට පවසා උපාය දූතයෙකු යවා සැකකාරියට මුදල් ලබා දෙන අවස්ථාවේදී අත්අඩංගුවට ගත් බව අල්ලස් කොමිසම අධිකරණයට දැනුම් දුන්නේය.
මෙම සැකකාර විදුහල්පතිනියගේ කාර්යාලයේ තිබී පෞද්ගලික මුදල් ලෙස දෙලක්ෂ පනස් නවදාස් තුන්සිය අසූවක මුදල් ප්‍රමාණයක්ද අල්ලස් කොමිසම අත්අඩංගුවට ගත් බව අධිකරණයට දැනුම් දුන්නේය. සැකකාර පාර්ශ්වය වෙනුවෙන් පෙනී සිටි නීතිඥ මොහාන් සෙල්ලප්පෙරුම මහතා සඳහන් කරනු ලැබුවේ මෙම විදුහල්පතිනියට අපහාස කිරීමේ අරමුණින් පැමිණිලිකාරිය විසින් බලෙන් මුදල් ලබා දීමක් සිදුකිරීමට තැත් කළ බවය. එම නීතිඥවරයාද සැකකරුහට ඇප ලබාදෙන ලෙස ද අධිකරණයෙන් ඉල්ලීය. ඒ අනුව ඉදිරිපත් වූ කරුණු සලකා බැලූ අධිකරණය සැකකාර විදුහල්පතිනිය ලබන 6 දක්වා තවදුරටත් රක්ෂිත බන්ධනාගාරගත කිරීමට නියෝග කළේය.
