ශ්‍රී ලංකාවේ හෑන්ඩ්බෝල් ක්‍රීඩාව ප්‍රචලිත කිරිමේ අරමුණින් ශ්‍රී ලංකා ගුවන් හමුදාව විසින් ශ්‍රී ලංකා හෑන්ඩ්බෝල් සම්මේලනයේ පූර්ණ අධීක්ෂණය යටතේ තෙවැනිවරට සංවිධාන කළ ගුවන් හමුදා ‘Eagles’ Cup’ අභියෝගතා කුසලාන විවෘත හෑන්ඩ්බෝල් තරගාවලියේ පිරිමි ශූරතාව දිනා ගැනීමට යුද හමුදා කණ්ඩායම සමත් වූ අතර, කාන්තා ශූරතාව සත්කාරක ගුවන් හමුදාවට හිමි විය.
කොළඹ සුගතදාස ක්‍රීඩාංගණයේදී ඊයේ නිමා වූ මේ තරගාවලියේ පිරිමි අවසන් තරගයේදී යුද හමුදාව සහ නාවික හමුදාව තරගවැදුණු අතර, නියමිත කාලය තුළ දෙපිලම ලකුණු 38 බැගින් ලබා ගත්තේය. ඒ අනුව දඬුවම් පහර 5 බැගින් ලබාදුන් අතර, එහිදී යුද හමුදා ක්‍රීඩකයෝ ජය තහවුරු කර ගත්හ. 
කාන්තා අවසන් තරගයේදී ගුවන් හමුදාව හමුවේ යුද හමුදා ක්‍රීඩිකාවෝ ලකුණු 22-18ක් ලෙස පරාජයට පත් වූහ.
තරගාවලියේ දක්ෂතම ක්‍රීඩකයා ලෙස යුද හමුදාවේ කේ.එම්.ආර්. ගුණවර්ධන සහ දක්ෂතම ක්‍රීඩිකාව ලෙස ගුවන් හමුදාවේ ඒ.පී.ආර්. නිර්මානි සම්මාන දිනා ගත්හ.
පිරිමි අංශයේ දක්ෂතම දැල් රකින්නා එම්.ඩබ්.ඒ.පී. වීරසිංහ (යුද), ද දක්ෂතම පහර දෙන්නා ලෙස ඩබ්.ඒ.සී.පී. විජේන්ද්‍ර (නාවික) සහ දක්ෂතම ආරක්ෂා කරන්නා ලෙස ටී.ඒම්.පී.කේ. තිලකරත්න සම්මාන දිනාගත් අතර, කාන්තා අංශයෙන් දක්ෂතම දැල් රකින්නිය පී.අයි.ඩී.ඒ.ස්. ප්‍රනාන්දු (ගුවන්) දක්ෂතම පහර දෙන්නිය ලෙස එම්.ඒ.ස්. මුණිදාස (ගුවන්) සහ දක්ෂතම ආරක්ෂාකරන්නිය ලෙස ඩබ්.පී. එරන්දි (ගුවන්) නම් කෙරිණි.
තරගාවලියේ ජය සංකේත ප්‍රදානය ගුවන් හමුදාපති එයාර් මාර්ෂල් උදේනි රාජපක්ෂ මහතාගේ ප්‍රධානත්වයෙන් සිදු කෙරිණි.
