– නියෝජ්‍ය කථානායක මොහොමඩ් රිස්වි
– නියෝජ්‍ය කාරක සභා සභාපති හේමාලි වීරසේකර
දසවැනි පාර්ලිමේන්තුවේ අභිනව කථානායක ධුරයට ජාතික ජන බලවේගයේ පාර්ලිමේන්තු මන්ත්‍රී අශෝක රන්වල මහතාත්, නියෝජ්‍ය කථානායක ධුරය සඳහා වෛද්‍ය මොහොමඩ් රිස්වි සාලි මහතාත්, නියෝජ්‍ය කාරක සභා සභාපති ධුරය සඳහා හේමාලි වීරසේකර මහත්මියත් පාර්ලිමේන්තුවේදී ඊයේ (21) යෝජනා ස්ථිරත්වයෙන් තෝරා පත්කර ගැනිණි.
මොවුන් තිදෙනාම ප්‍රථමවරට පාර්ලිමේන්තුවට තේරී පත් වූවන් වන අතර මෙම ප්‍රධාන තනතුරු සඳහා නවක මන්ත්‍රීවරු තිදෙනකු පත් කළ ඉතිහාසයේ ප්‍රථම අවස්ථාව මෙය ද වේ. මේ තිදෙනා අදාළ තනතුරුවලට පත් කරන ලද්දේ සභාවේ ඒකමතික අනුමැතියෙනි.
කථානායක ධුරය සඳහා අග්‍රාමාත්‍ය ආචාර්ය හරිනි අමරසූරිය මෙ‍ණෙවිය විසින් අශෝක රන්වල මහතාගේ නම යෝජනා කළ අතර අමාත්‍ය විජිත හේරත් මහතා විසින් එය ස්ථිර කෙරිණි.
කථානායකවරයාගේ නාමයෝජනාව, ස්ථිර කළ අග්‍රාමාත්‍යවරිය සහ අමාත්‍ය විජිත හේරත් මහතා විසින් සාම්ප්‍රදායිකව නව කථානායකවරයා සිය අසුන වෙත කැඳවාගෙන යෑම සිදු කෙරිණි. කථානායකවරයා විසින් තමා පත්කිරීම පිළිබඳ කෙටි ස්තුතියක් මෙහිදී පිරිනැමූ අතර අනතුරුව කථානායකවරයා විසින් මහලේකම්වරිය ඉදිරියේ සිය ප්‍රතිඥාව හෝ දිවුරුම ලබා දෙන ලදි. අනෙකුත් සියලු මන්ත්‍රීවරයන් විසින් නිල ප්‍රතිඥාව හෝ දිවුරුම ලබා දීම සිදු විය.
නියෝජ්‍ය කථානායක ධුරය සඳහා වෛද්‍ය මොහොමඩ් රිස්වි සාලි මහතාගේ නම ආණ්ඩු පක්ෂයේ ප්‍රධාන සංවිධායක අමාත්‍ය වෛද්‍ය නලින්ද ජයතිස්ස මහතා විසින් යෝජනා කළ අතර අමාත්‍ය සරෝජා පෝල්රාජ් මහත්මිය විසින් ස්ථිර කළාය.
අභිනව නියෝජ්‍ය කාරක සභා සභාපති ධුරය සඳහා හේමාලි වීරසේකර මහත්මියගේ නම අමාත්‍ය සුනිල් හඳුන්නෙත්ති මහතා විසින් ඉදිරිපත් කරන ලදුව පාර්ලිමේන්තු මන්ත්‍රිනී සමන්මලී ගුණසිංහ මහත්මිය එය විසින් ස්ථිර කළාය.
