පල්ලෙබැද්දට අනුමත වූ පොලීසියට මොකද වුණේ?
රටේත්, ජනතාවගේත්, ආරක්ෂාවට නීතියේ සාමයේ පැවැත්මට ප්‍රමුඛත්වය දීම නව ජනාධිපතිතුමන් ඇතුළු රජයේ පාලනතන්ත්‍රයෙන් සිදුවිය යුතු මහත් මෙහෙවරකි. එය ජනතාවගේද අපේක්ෂාවයි. ප්‍රදේශයේ විශාල ජනතාවකට අත්‍යවශ්‍ය වූ වැදගත් සුවිශේෂ වූ සේවාවක්, අපහසුතාවලින් තොර කාර්යක්ෂම සේවාවක් සඳහා වසර 3කට පමණ පෙර පල්ලෙබැද්ද නමින් පොලිස් ස්ථානයක් පිහිටුවීමට අනුමත වී ඒ සඳහා අවශ්‍ය බඩු භාණ්ඩ පවා වෙන් කරන ලදි. මේ වැදගත් අවශ්‍යතාව අත්‍යවශ්‍ය කරුණක් බවට මහා සංඝරත්නය හා ප්‍රභූවරු, විවිධ සමිති සමාගම් හා ජනතාව විසින් නිරන්තරයෙන්ම අදාළ වගකිව යුත්තන්ගේ අවධානය යොමු කළේ ප්‍රදේශයේ පවතින අපරාධ, මිනීමැරුම්, විවිධ නීති විරෝධි ජාවාරම්, මත්ද්‍රව්‍ය ජාවාරම් වැනි දූෂිත ක්‍රියා වර්ධනයවීම නිසාවෙනි.
එමෙන්ම අනුමත වූ මෙම පොලිස් ස්ථානය කොස්වැටිය ප්‍රදේශය කේන්ද්‍ර කර ගනිමින් ඒ ආසන්නයෙන්ම පිහිටුවන ලෙසට ද කරුණු කාරණා පැහැදිලිවම සාක්ෂි සහිත ව පෙන්වා දෙන ලදි.
ප්‍රධාන වශයෙන්ම මේ ජනතාවට පොලීසියක අවශ්‍යතාවක් වෙනුවෙන් උඩවලව හා ගොඩකවෙල පොලිස් ස්ථානවලට විශාල දුරක් ගෙවා යාමත් මධ්‍යස්ථ ප්‍රදේශය කොස්වැටිය ප්‍රදේශය බවත් අපහසුතාවලින් තොර කාර්යක්ෂම සේවයක් අතුරු ගම්මාන රැසක දුගී දුප්පත් ජනතාවගේ පහසුවත් ප්‍රදේශයේ පවතින වාතාවරණයත් හේතුකොට ගෙන ඉල්ලීම් කරන ලදි. නමුත් මෙම මහජන අවශ්‍යතාව ඉටු කිරීමට වඩා ඉටු නොකිරීමට කරුණු කාරණා, පුහු තර්ක ඉදිරිපත් කරමින් කටයුතු කිරීම නිසා නීතියට, සාමයට, ආරක්ෂාවට , ජනතාවට සිදුවන ඉමහත් සේවාවට අභාග්‍යසම්පන්න තත්ත්වයක් උදාවීම ජනතාවගේ කලකිරීමට හේතුවකි. මේ සඳහා පෞද්ගලික ගොඩනැඟිලි සොයමින් සිටින අවස්ථාවේ ඒ සඳහා වැයවන මුදල වළක්වාලීමට අප විසින් රජයට අයත් ගොඩනැඟිල්ල සහිත ඉඩමක් පෙන්වා දුන්න ද එය නොසලකා හැරීම කනගාටුවට කරුණකි.
මේ ඉඩම හා ගොඩනැඟිල්ල එක්තරා ආයතනයකට අයත්ව තිබුණ ද කාලාන්තරයක් තිස්සේ වසා දමා වල් බිහි වී තිබූ රජයට අයත් ස්ථානයකි. මෙයින් ජනතාවට කිසිදු වැදගත් සේවාවක් මහජන අවශ්‍යතාවක් මේ වන විටත් ඉටු නොවන බවත් විවිධ තර්ක අසත්‍ය කරුණු කාරණා දක්වමින් වැදගත් ජනතා සේවාවක් ඉටුවීම නොසලකා හැර ඇත. ඒ සඳහා වගකිව යුතු තනතුරුවලින් අසත්‍ය ප්‍රකාශ කිරීම ද කර ඇත. මෙම ඉඩමේ හා ගොඩනැඟිල්ලේ අයිතිය අදාළ ආයතනයට අයත් නොවන බව අනාවරණය වන බව ද වගකිව යුතු තනතුරුවලින් සනාථ කර ඇත. එමෙන්ම කහවත්ත පැල්මඩුල්ල පොලිස් ස්ථාන පිහිටීමත් එහි නගර පිහිටීමත් සලකන විට පල්ලෙබැද්ද නමින් අනුමත වූ පොලිස් ස්ථානය කොස්වැටිය ප්‍රදේශයේ පිහිටුවීම නුසුදුසු ද යන්න විමසිය යුත්තකි.
නව රජය ආර්ථිකය ගොඩනඟමින් ජනතා සේවාවන් වෙනුවෙන් අතිමහත් වූ කැපවීමෙන් කටයුතු කරන නව ජනාධිපතිතුමනි, අදාළ අමාත්‍යතුමනි, ආරක්ෂක අමාත්‍යාංශයේ හා පොලිසිය භාර අමාත්‍යාංශයේ නව ලේකම්තුමනි, පොලිස්පතිතුමනි, අපගේ ඉල්ලීම ඉටු කර දී කාර්යක්ෂම ජනතා සේවාවක් ඉටු කර දෙන්න. ආරක්ෂාවට මුල් තැන දෙන්න. ජනාධිපතිතුමා ඇතුළු නව රජයේ ප්‍රභූවරුනි ඔබ සැමට සුබ ගමන්, (අරඹමු නව පුනරුදයක්)
ඩබ්.ඒ.සිරිපාල
කොස්වැටිය, පල්ලෙබැද්ද
සරණ පාර ජෝ නමින් නම් කරමු
සිංහල සිනමාවේ දැවැන්තයකු වූ ජෝ අබේවික්‍රම මහතාගේ නමට ගෞරවයක් ලෙස කොළඹ හත පිහිටි සරණ පාර ජෝ අබේවික්‍රම මාවත ලෙස නම් කරන ලෙස කොළඹ මහ නගර සභාවට ඉදිරිපත්ව එය ස්ථිර වුවද ඒ යෝජනාව මෙතෙක් ක්‍රියාත්මක වී නැත.
කොළඹ හිටපු නගරාධිපති රෝසි සේනානායක මහත්මිය විසින් යෝජනා කළ මෙම යෝජනාව හිටපු ආණ්ඩු පක්ෂ සංවිධායක ටයිටස් පෙරේරා මහතා විසින් ස්ථිර කර දැන් බොහෝ කල්ය. එහෙත් දැන් බොහෝ කල් ගතව ඇතත් එම යෝජනාව ක්‍රියාත්මක කර නැත. ඒ නිසා අප ඉල්ලා සිටින්නේ සිනමා දැවැන්තයාට ගරු කිරීමක් ලෙස සරණ මාවත ජෝ අබේවික්‍රම මාවත ලෙස නම් කරන්නේ නම් එය මෙරට සමස්ත කලාවටම කරනු ලබන ගරුත්වයකි.
ආරියරත්න ගණේගොඩ
මැද කොළඹ
මැතිසබයට සුබ පැතුම්
ඝන අන්ධකාරයට ආලෝකයක් මෙන් 2024.11.15 දිනට යෙදුණු පුරපසළොස්වක පොහොය (ඉල්මස) උදාවූයේ පෙර දින රාත්‍රී අඹරෙහි පායන ලද සෞම්‍ය වූ සඳ කිරණ සමඟිනි. එය වූ කලී ස්වර්ණමය කාලපරිච්ඡේදයකි. පෙරළුණු පොතෙහි රන් පිටුවක් උදාකරලීමට. එනම් දසවැනි පාර්ලිමේන්තු මහමැතිවරණයෙන් තුනෙන් දෙකක අතිවිශිෂ්ට ජයග්‍රහණයක් ලබමින් ජාතික ජන බලවේගය (මාලිමාව) රජයක් පිහිටුවීම.
දශක හතක් පුරාවට වල්වැදී මජරව දූෂිතව විනාශ වී සෞඛ්‍ය, අධ්‍යාපනය, සංස්කෘතිය හා ආර්ථිකය යන අංශයන් ප්‍රධානව සෙසු ප්‍රභේදයන් ආදාහනය වී, භූමිදානය වී තිබුණු ඛේදජනක පැකේජයකට ජීවය පණපොවමින් ඊට යථාර්ථයක් , අරුතක් මුසු කරමින් ලෝකෙන් උතුම් රට ශ්‍රී ලංකාද්වීපය කිරීමේ සැබෑවූත් අව්‍යාජව අවංකව වැටී තිබූ රට වැනසී යමින් සිටින ජනතාව ඉන් මුදා ගැනීමේ ශ්‍රේෂ්ඨ කර්තව්‍යය වෙත ප්‍රවිෂ්ටව සිටින පසුගියදා පැවති ජනාධිපතිවරණයෙන් ලෝක වාර්තාවක් තබමින් තිදෙනකුගෙන් යුතු අමාත්‍ය මණ්ඩලයක් ඉතා අපූරුවට ඉටු කරමින් ජනාධිපති අනුර කුමාර දිසානායක, විජිත හේරත් යන මැතිතුමන්ලා සහ ආචාර්ය හරිනි අමරසූරිය අග්‍රාමාත්‍යතුමිය ප්‍රධානව ජාතික ජන බලවේග රජයෙහි අභිනව පාර්ලිමේන්තුව වෙත පත් වූ විශ්වවිද්‍යාල ආචාර්යවරුන්, මහාචාර්යවරුන්, නීති‍වේදීන්, ගුරුවරුන්, ඉංජිනේරුවරුන්, මිනින්දෝරුවරුන්, මාධ්‍යවේදීන්, ත්‍රිවිධ හමුදාවේ උසස් නිලධාරින් යන පළපුරුදු දක්ෂයින් හට, සුබ ප්‍රාර්ථනා ගෙන එන්නෙමි. 2024.11.21 වැනි දින බ්‍රහස්පතින්දා සුබ නැකතට අභිනව පාර්ලි‍මේන්තුවෙහි පවත්වනු ලබන ප්‍රථම වූත් නව සැසිවාරය අරබයා
සරත් ලියනගේ
රන්මුතුගල
පස්ගොඩ සභාවට මල්මිටක්
පස්ගොඩ ප්‍රාදේශීය ලේකම් බලප්‍රදේශයට අයත් පස්ගොඩ රොටුඹ පාරේ සිට පොතුහැල්ගොඩ හරහා ආදලුව දක්වා වන මාර්ගය ප්‍රදේශයේ ජනතාවගේ සියලු ප්‍රවාහන අවශ්‍යතා ඉටුකරන මාර්ගයකි.
විශේෂයෙන් ප්‍රදේශයේ කුඩා තේ වතු හිමියන්ගේ අමු තේ දලු ප්‍රවාහනයටත් රොටුඹ පාරේ සිට මාවරල ප්‍රධාන මාර්ගයට පි‍විසෙන කෙටි මාර්ගයක් ලෙසද විශාල පිරිසක් මෙම මාර්ගය ප්‍රයෝජනයට ගනිති. පසුගිය වසර කිහිපයක් තිස්සේ මෙම මාර්ගයේ සංවර්ධන කටයුතු සිදු නොවීම නිසා වාහන ගමනාගමනයට මෙන්ම පාගමනින් යාමද දුෂ්කර වී පැවතුණි.
ප්‍රදේශයේ මාර්ග සංවර්ධනය සඳහා විවිධ ව්‍යාපෘති ක්‍රියාත්මක වුවත් මෙම මාර්ගයේ සංවර්ධන කටයුතු පිළිබඳව දිස්ත්‍රික්කයේ පක්ෂ, විපක්ෂ සියලු දේශපාලනඥයන් වෙත ඉල්ලීම් කළත් ඉන් කිසිදු පලක් නොවීම කනගාටුවට කරුණකි. මේ පිළිබඳව පස්ගොඩ ප්‍රාදේශීය සභාවේ ලේකම්තුමිය වෙත කරන ලද ඉල්ලීමකට අනුව මාර්ගයේ දැඩි‍ලෙස අබලන් වී පැවති කොටස් කිහිපයක් පසුගියදා ඉන්ටර්ලොක් ගල්අතුරා සංවර්ධනය කරදීමට කටයුතු කර තිබුණි.
මේ පිළිබඳව ප්‍රදේශවාසී ජනතාවගේ ගෞරවය සහ ස්තුතිය මේ සඳහා මැදිහත් වූ පස්ගොඩ ප්‍රාදේශීය සභාවේ ලේකම්තුමිය ඇතුළු නිලධාරි මණ්ඩලයට පිරිනමමු.
සෝමදාස කන්දගේ
මාතර
පාරිභෝගික හැසිරීම ගැන අදහසක්
වෙළෙඳපොළ සමන්විත වන්නේ නිෂ්පාදකයා, වෙළෙන්දා සහ පාරිභෝගිකයා යන සාධක ත්‍රිත්වයේ සංකලනයක් ලෙසයි. බොහෝ විට පාරිභෝගිකයා වෙළෙඳපොළේ ප්‍රධානතම සාධකය වේ. මිශ්‍ර ආර්ථිකයක් ඇති ශ්‍රී ලංකාව තුළ පාරිභෝගිකයා ආරක්ෂා කිරීමට බොහෝ නීතිරීති පනවා ඇත. ගෝලීය වෙළෙඳපොළ තුළද පාරිභෝගික ආරක්ෂණ ප්‍රතිපත්ති ක්‍රියාත්මක වේ. එයින් පෙන්නුම් කරන්නේ වෙළෙඳපළේ ක්‍රියාකාරිත්වයට පාරිභෝගිකයා අත්‍යවශ්‍ය සාධකයක් ලෙසයි.
වෙළෙඳපොළ තුළ පාරිභෝගිකයන් විවිධ වූ හැසිරීම් රටා පෙන්වයි. එම හැසිරීම් ව්‍යාපාරයක වර්තමාන සහ අනාගත තත්ත්වයන්වලදී තීරණ ගැනීමට උපකාරී වේ.
පාරිභෝගික හැසිරීම් සඳහා ඒ ඒ පාරිභෝගිකයාගේ පෞද්ගලික, මානසික, සාමාජයීය සහ සංස්කෘතික සාධක බලපායි. මෙම සාධක පාරිභෝගික හැසිරීම ගැන අදහසක් ගැනීමට උපකාරී වුවද ඒවා පාලනය කිරීමට අපහසු වේ.
පාරිභෝගික හැසිරීම අධ්‍යයනය කිරීම සහ ඔවුන් ක්‍රියාකරන්නේ කෙසේද යන්න තීරණය කළ හැකිය. ඒ අනුව අලෙවිකරුවන්ට වෙළෙඳපොළ තුළ වඩාත් ඵලදායීවීමට පාරිභෝගික හැසිරීම උපකාරී වේ. අලෙවිකරණය තුළ පදනම වන්නේ උසස් වටිනාකමක් ලබා දෙමින් නව ගනුදෙනුකරුවන් ආකර්ෂණය කරගැනීම සහ තෘප්තියක් ලබා දෙමින් වත්මන් ගනුදෙනුකරුවන් තබා ගැනීමයි. පාරිභෝගික හැසිරීම පිළිබඳව කොට්ලර් සහ කෙලර් යන පර්යේෂකයන් පවසා ඇත්තේ “පාරිභෝගික හැසිරීම යනු පාරිභෝගිකයන්ගේ තීරණ ගැනීමේ ක්‍රියාවලිය සහ ආදාන – ප්‍රතිදාන ක්‍රියාවලියයි”
පාරිභෝගික හැසිරීමේ අනාගතය තාක්ෂණය මඟින් නිර්මාණය වේ. මේ දිනවල තාක්ෂණය ඩිජිටල් අවකාශය යනු නව පරම්පරාවට වඩාත්ම සමීපතම වේදිකාවයි. අන්තර්ජාල වෙ‍ළෙඳාම තුළ පාරිභෝගිකයන්ට තමන්ගේ අදහස්, අත්දැකීම් බෙදාගැනීමට හා වඩාත් ප්‍රශස්ත නිෂ්පාදන සොයාගැනීමට විවෘත ඉඩකඩක් පවතී.
අවසන් වශයෙන් පාරිභෝගිකයා යනු වෙළෙඳපළේ වඩාත් ප්‍රබලතම සාධකය වන අතර, ඔවුන්ගේ හැසිරීම සහ එම හැසිරීම් අධ්‍යයනය කිරීමෙන් අලෙවිකරුවන්ට වඩාත් සාර්ථක වීමට හා තරගකාරි වෙළෙඳපොළට සහභාගිවීමට හැකිවේ. තවද පාරිභෝගික හැසිරීම වාණිජ වෙළෙඳපළ තුළ වඩාත් කාර්යක්ෂම හා සාර්ථක වාණිජ මෙවලමක් යැයි කිව හැකිය.
තරුෂිකා රසාංජලී,
වාණිජ හා කළමනාකරණ පීඨය,
නැ‍ඟෙනහිර විශ්වවිද්‍යාලය.
අහංගම අවනඩුවක්
පසුගිය රජයේ වගකිව යුතු බලධාරීන් පිරිසක් ගත් අත්තනෝමතික තීරණයක් මත අහංගම ප්‍රදේශයේ ජාතික මට්ටමේ පාසල් භුමියේ බාහිර අයෙකු අනවසරයෙන් ගොඩනැඟිල්ලක් ඉදිකරගෙන යන බව, ප්‍රදේශවාසීහු පෙන්වා දෙති.
මෙම තත්ත්වය පිළිබඳව එවකට පැවැති රජයේ බලධාරීන්ට කීවද, සාධාරණ විසඳුමක් ලැබී නැත. ඉදිකිරීම නවතාලීමට ඔවූහූ අසමත්වී ඇත. මොවුන් එකිනෙකාට බෝලය පාස් කරමින් ස්වකීය වගකීමි යුතුකමි පැහැර හැර ඇති බව, ආරංචිමාර්ගවලින් සනාථ වන්නේය.
මෙම, අසාධාරණයට සාධාරණ විසඳුමක් ලබාදෙන මෙන් ජනතාව ඉල්ලා සිටිති. නව රජයේ වගකිව යුතු අදාළ බලධාරී මහතුන්ගේ අවධානය නොපමාව යොමු විය යුතුය.
අනුර ද සිල්වා – මාතර
