මඩකලපුව කාත්තන්කුඩි පොලිස් වසමේ කල්ලඩි ප්‍රදේශයේ නවාතැන් ගෙන සිටි ස්විස් ජාතික කාන්තාවකට පහරදී රුපියල් කෝටි දෙකකට අධික විදේශ මුදල් සහ රන් මාලයක් කොල්ලකා පලා ගිය කොල්ල කණ්ඩායමක් සොයා පරීක්ෂණයක් ආරම්භ කර ඇතැයි කාත්තන්කුඩි පොලීසිය කියයි.
මෙලෙස කොල්ලකෑමක් සිදුව ඇත්තේ, මඩකලපුව කල්ලඩි බේබිසිංගම් පාරේ නිවෙසක තනිව වාසය කළ සුප්පයියා පිල්ලයා කෝනේෂ්වරි නමැති 62 හැවිරිදි ස්විස් ජාතික කාන්තාව බවද පොලීසිය සඳහන් කරයි.
එම නිවසේ නාන කාමරයේ ජනේලය බිඳ ඊයේ (20) දහවල් නිවෙස තුළට රිංගා ඇති කොල්ල කණ්ඩායම, අල්මාරිය කඩා එහි තිබූ සුවිස් ෆ්‍රෑන්ක් (ශ්‍රී ලංකා මුදලින් කෝටි 2යි ලක්ෂ 40ක්) සහ පවුම් එකහමාරක රන් මාලයක්, රුපියල් විසි නවදහසක මුදලක් කොල්ලකා නිවෙසේ සිටි මහලු කතට පහරදී පලා ගොස් ඇතැයි ද පොලීසිය කියයි. 1990 වසරේදී ස්විස් රටට ගොස් ඇති මෙම කාන්තාව සහ ඇගේ සැමියා එහි පුරවැසිභාවය ලබාගෙන ඇති අතර, මඩකලපුවේ පිහිටි නිවෙසට මෙම කාන්තාව පැමිණ ඇත්තේ ගමරට බලා නැවත යෑම සඳහා බවත් පොලීසිය පවසයි. මෙම ස්විස් ජාතික කාන්තාවගේ සැමියා එරට ඉංජිනේරුවකු වන අතර, ඔහු සහ ඔහුගේ දියණිය ස්විස් හි පදිංචිව සිටින බවද පොලීසිය සඳහන් කරයි. පහරකෑමට ලක්වූ කාන්තාව හෙදියක ලෙස ස්විස් රටේ සේවය කර විශ්‍රාම ගෙන මෙරටට පැමිණ නවාතැන් ගෙන සිටියදි මෙම කොල්ලය සිදුව ඇතැයි ද පොලීසිය කියයි.
