මිනුවන්ගොඩ සහ ඒ අවට ප්‍රදේශවල සිට පාසල් සිසුන් හා ගුරු භවතුන් වෙනුවෙන් සිසුසැරිය පාසල් සේවා බස් රථ 35ක් මේ වන විට ක්‍රියාත්මක කර ඇතැයි බස්නාහිර පළාත් මාර්ගස්ථ මගී ප්‍රවාහන අධිකාරියේ මිනුවන්ගොඩ ශාඛාවේ කළමනාකරු රවින්ද වෙත්තසිංහ මහතා සඳහන් කළේය. මෙම බස් රථ සේවා ගම්පහ සහ කොළඹ දිස්ත්‍රික්ක දෙකෙහි පාසල් විශාල ප්‍රමාණයක් ආවරණය වන පරිදි ධාවනයට යොදවා ඇතැයි ද ඒ මහතා කියා සිටියේය. ඒ අනුව සිසුසැරිය බස් රථ 25ක් සහ පාසල් සේවා බස් රථ 10ක් මේ වන විට ක්‍රියාත්මක කර ඇති බව පවසන වෙත්තසිංහ මහතා, සිසුසැරිය බස් රථ සඳහා ගමන් ගාස්තුවෙන් අඩක් ගෙවීමෙන් හා පාසල් සේවා බස් රථ සඳහා සාමාන්‍ය ගාස්තුව යටතේ පාසල් දරුවන්ට හා ගුරු භවතුන් වෙනුවෙන් ප්‍රවාහන පහසුකම් සලසා ඇතැයි ද කියා සිටියේය. ඔහු වැඩිදුරටත් කියා සිටියේ, පාසල් සේවා වෑන් රථවලින් සිසු දරුවන්ගේ මවුපියන්ගෙන් අසාධාරණ ලෙස සිදු කරන මුදල් අය කිරීම පාලනයට පාසල් දරුවන් සඳහා ඉතා උසස් ආරක්ෂාකාරී ප්‍රවාහන පහසුකම් සලසා දීම වෙනුවෙන් මෙම වැඩපිළිවෙළ ක්‍රියාත්මක කරන බවයි.
ජාතික ගමනාගමන කොමිෂන් සභාවේ පූර්ණ උපදේශකත්වය යටතේ ක්‍රියාත්මක මෙම පාසල් ප්‍රවාහන සේවා පහසුකම් ලබා ගැනීමට අවශ්‍ය පාසල් සිසු දරුවන් හෝ දෙමාපියන්ට, පාසල්වලට, ගුරුභවතුන්ට දුරකථන අංක 011 2247150 හෝ 0112247160 යන අංක ඔස්සේ මාර්ගස්ථ මගී ප්‍රවාහන අධිකාරියේ මිනුවන්ගොඩ ශාඛාවට කතා කර අවශ්‍ය විස්තර ලබා ගත හැකි බව මිනුවන්ගොඩ ප්‍රාදේශීය කළමනාකරු රවින්ද වෙත්තසිංහ මහතා වැඩිදුරටත් පැවසීය.
