තනිව නි‍ෙවසේ විසූ 84 හැවිරිදි කාන්තාවකට අයත් රුපියල් 3,04,600ක් වටිනා මුදල් හා රන් භාණ්ඩ කිසිවකු විසින් මහ දවල් සොරාගෙන යන ලද සිද්ධියක් සම්බන්ධයෙන් මීගහතැන්න පොලීසිය පරීක්ෂණ පවත්වයි.
මීගහතැන්න, ඉඳිගස්ගොඩැල්ලේ පදිංචි පිටිගල කංකානම්ගේ ප්‍රේමවතී යන අය විසින් පොලීසියට කරන ලද පැමිණිල්ල අනුව මෙම පරීක්ෂණ ආරම්භ කොට තිබේ.
ඉකුත් 18 වැනිදා උදේ 9.15ත් 10.15ත් අතර කාලයේ මෙම සොරකම සිදුවී ඇතැයි පොලීසිය පවසයි.
තමා තනිව නි‍ෙවසේ වාසය කරන බවත් සිද්ධිය වූ දිනයේ උදේ 9.15 ට පමණ නි‍ෙවසේ පිටුපස දොර අඩක් විවෘතව තබා අසල පිහිටි තේ ඉඩමේ දලු සෑදී ඇතිදැයි බැලීමට ගිය බවත් ආපසු උදේ 10.15ට පමණ නි‍ෙවසට පැමිණි බවත් ඇය පොලීසියට කර තිබූ පැමිණිල්ලේ සඳහන් වේ.
ඇඳේ කොට්ට, මෙට්ට ඇද දමා ඇති බව දැක පරික්ෂා කිරීමේ දී මෙට්ටය යට කහ පැහැති බෑගයක තිබූ රුපියල් 4000ක මුදලක් ද, බෝල කූඩුවේ බෑගයක දමා එල්ලා තිබූ රුපියල් 600ක මුදලක්ද, අල්මාරියේ තිබූ රුපියල් 2,25,000ක් වටිනා රන් මාලයක්, රුපියල් 75000ක් වටිනා රන් වළල්ලක් හා අත් ඔරලෝසු දෙකක්ද සොරාගෙන ගොස් තිබූ බවත් ඇය කර තිබූ පැමිණිල්ලේ වැඩිදුරටත් සඳහන් කර ඇත.
