මීගොඩ හා අවට ප්‍රදේශවලට පෙරේදා (19) පස්වරුවේ දැඩි සුළඟත් සමඟ පැවති අධික වර්ෂාව හේතුවෙන්, ගස් කඩාවැටීම නිසා විදුලි රැහැන් පද්ධතිවලට සහ අධිබල විදුලි රැහැනක කනුවකට දැඩි හානි සිදුවී ඇතැයි මීගොඩ පොලීසිය පවසයි.
මීගොඩ සම්පත් මධ්‍යස්ථාන මාර්ගයේ විශාල ගසක් විදුලි රැහැන් පද්ධතියක් මතට කඩාවැටී තිබුණි. මීට අමතරව මීගොඩ මහා විද්‍යාලය ආසන්නයේ තිබූ ගසක අත්තක් අධි බලැති විදුලි රැහැන් පද්ධතිය මතට කඩා වැටීම හේතුවෙන් එම විදුලි කණුව දෙකට මැදින් කැඩී එල්ලෙමින් පැවතුණි.
මෙලෙස විදුලි රැහැන් සහ ගස් හයිලෙවල් මාර්ගයට කඩාවැටීම හේතුවෙන් පස්වරු කාලයේ මාර්ගයේ දැඩි රථවාහන තදබදයක් පැවති අතර, මීගොඩ පොලිස් ස්ථානයේ නිලධාරීන් සහ ප්‍රදේශවාසීන් එක්ව මාර්ගයට වැටී තිබූ ගස්වල අතු කපා දමා මාර්ගයේ රථවාහන ධාවනයට ඉඩ සලසා දෙන ලදි.
මෙම හදිසි ආපදාව හේතුවෙන් ප්‍රදේශයට විදුලිය විසන්ධිවී තිබීම නිසා ප්‍රදේශයේ ජනතාව දැඩි අපහසුතාවට පත්ව සිටියහ.
